Ciidamada Booliska Dowlad Goboleedka Puntland ayaa gacanta ku dhigay dad looga shakisan yahay in ay yihiin burcad badeed kadib howlgalo adag oo qaatay muddo 24 saac ah oo ka dhacay deegaanka Raas Casayr. Dadkan oo looga shakisan yahay in ay yihiin burcadbadeed ayaa lagu soo qabtay dooni siday shidaal iyo qori.
Sida ay sheegeen ciidamada Puntland eedaysanayaasha ayaa hadda ku jira gacanta booliska iyagoo sugaya baaritaanno dheeraad ah oo ku saabsan doorkooda iyo doonida ka shaqeysa biyaha Soomaaliya.
Ciidamada ayaa soo bandhigay saddex nin halka ay shaaciyeen in afar kale oo kooxda ka tirsanaa balse ka baxsaday ciidamada ay ku raad joogaan sida warsaxaafadeedka ka soo baxay Taliska Booliska Dowlad Goboleedka Puntland.
General Maxamed Xasan Ciise oo ah Taliyaha Degmada Beereda ee deegaanka Raas Casayr ee Dowlad Goboleedka Puntland oo la hadlay Warbaahinta ayaa sheegay in ragaan la soo eedeeyay la horgeyn doono sharciga si loo wajaho sharciga.
Ciidamada Booliska Puntland ayaa intii ay howlgaladu socdeen waxa ay ku wargeliyeen dadka ku dhaqan xeebaha in ay la wadaagaan wixii xog ah ee la xiriira afarta nin ee baxsadka ah ee Booliska ka baxsaday oo baxsad ah.
Dhacdadan ayaa muujineysa caqabadaha joogtada ah ee kooxaha burcad badeeda ay ka geysanayaan xeebaha Soomaaliya, inkastoo ay jiraan dadaalo wadajir ah oo ay wadaan ciidamada badda ee ku wajahan la dagaalanka burcad badeeda Soomaalida.
