Hay’adda Duulista Hawada Soomaaliya (SCAA) ayaa soo saartay amar 48 saacadood ah oo ay Kenya Airways ku qaadanayso, waxayna dalbatay in sharaxaad rasmi ah laga bixiyo, lana xaliyo wararka sheegaya dib u dhac weyn oo sababay in rakaabkii Soomaalida ahaa ay ku xayiran yihiin garoonka Jomo Kenyatta International Airport ee magaalada Nairobi muddo saddex maalmood ah. Ugu dambayntii waxa ay daba socotaa walaac isa soo taraya oo laga qabo sida loola dhaqmo muwaadiniinta Soomaaliyeed oo ay ku jiraan shaqaalaha rayidka ah, kuwaas oo loo diiday in ay gudaha u galaan dalka Kenya in kasta oo ay haystaan fiisayaal sax ah, waxaana lagu qasbay in ay muddo dheer sugitaan la’aan hoteello.
Xaaladdan ayaa caro ballaaran ka dhalisay Soomaaliya, iyadoo dad badan ay u arkaan dib u dhaca iyo diidmada gelitaanka inay yihiin falal lagu bartilmaameedsanayo muwaadiniinta Soomaaliyeed. Wararku waxa ay sheegayaan in Rakaabkii Soomaalida ahaa ee saarnaa Diyaarada ay xayiran yihiin kadib markii Shirkadda Diyaaradaha ee Kenya Airways ay joojisay Duulimaadyadii ay ku tagi jirtay Muqdisho muddo 3-maalmood ah, taasi oo keentay in aysan helin wax gurmad ah.
Iyadoo laga falcelinayo dhacdooyinkaas, ayaa la sheegay in SCAA ay muddo kooban hakisay duulimaadkii Kenya Airways ee ka duuli lahayd garoonka diyaaradaha Aadan Cadde ee magaalada Muqdisho gelinkii hore ee maanta, taasoo muujineysa sida ay uga xun yihiin qaabka ay shirkadu u maamusho rakaabka Soomaaliyeed ee ku sugan magaalada Nairobi. Diyaaradda ayaa laga hor istaagay inay duusho, iyadoo madaxda Soomaaliya ay dalbadeen in sharaxaad laga bixiyo tacadiyada loo geysto muwaadiniintooda.
Bayaanka SCAA waxa uu iftiimiyay fashilka diyaarada ee ah in ay u hogaansanto shuruucda duulimaadka ee u baahan daryeel ku filan iyo hoyga rakaabka go’doonsan. Maamulka ayaa ku nuuxnuuxsaday in falalka noocaan ah ay ka hor imaanayaan heerarka duulimaadyada caalamiga ah iyo xuquuqda rakaabka.
Tallaabadan ay qaaday Hay’adda Duulista Hawada Soomaaliya ayaa ku soo beegmaysa iyadoo ay sii kordhayaan xiisadaha u dhaxeeya labada dal, iyadoo muwaadiniinta Soomaaliyeed ay muujinayaan niyad jab xooggan oo ay ka muujinayaan wax ay u arkayeen inay yihiin hayb sooc ay ku dhaqmaan madaxda Kenya. Xaalada ayaa ah mid xasaasi ah marka loo eego xiriirka taariikhiga ah iyo midka diblomaasiyadeed ee ka dhaxeeya Soomaaliya iyo Kenya.
Mas’uuliyiinta Soomaaliya ayaa si cad u sheegay inay ka filayaan diyaaradda Kenya Airways inay si degdeg ah arrintan wax uga qabato, isla markaana ay qaaddo tallaabooyin sax ah oo lagama maarmaanka ah. Shirkaddu waxay haysataa 48 saacadood oo ay kaga jawaabto wakhtiga kama dambaysta ah, markaas ka dib SCAA waxa laga yaabaa inay tixgeliso tallaabooyin dheeraad ah, oo ay ku jiraan cunaqabatayn suurtagal ah ama xannibaado joogto ah oo ku saabsan hawlaha Kenya Airways ee Soomaaliya
