Dowladda Jamhuuriyadda Dimuqraadiga ah ee Congo ayaa sheegtay in ugu yaraan 129 qof la dilay xilli ay isku dayayeen in ay ka baxsadaan xabsiga dhexe ee Makala ee caasimadda Kinshasa galinkii dambe ee Axaddii, iyadoo intaa ku dartay in xaaladda hadda la xakameeyay.
War qoraal ah oo la soo dhigay X subaxnimadii Talaadada, ayuu Wasiirka Arrimaha Gudaha Shabani Lukoo ku sheegay in dab uu sidoo kale ka kacay dhismaha maamulka xabsiga, bakhaarrada cuntada iyo isbitaal. Ilaa 59 qof ayaa ku dhaawacmay, ayuu raaciyay.
“Isku daygii baxsadka ahaa ee ka dhacay xabsiga dhexe ee Makala waxaa ka dhashay khasaare nafeed iyo mid hantiyeed,” ayuu ku yiri bayaanka muuqaalka ah.
Mar sii horreysay, sarkaal ka tirsan xabsiga ayaa sheegay inaysan jirin maxaabiis ku guuleysatay inay baxsato, isagoo intaas ku daray in kuwii isku dayay inay baxsadaan la dilay. Dawladdu waxay baadhaysay dhacdadan.
Isku dayga dillaaca ayaa dhacay abaaro 2-dii subaxnimo ee Axadii. Maxaabiista ayaa wakaaladda wararka ee Reuters u sheegay in ay maqleen rasaas xooggan, iyo sidoo kale dhawaqa maxaabiista.
