Gobolka ayaa heegan ku jiray tan iyo bishii Jannaayo markii Itoobiya ay sheegtay in ay damacsan tahay in ay ka dhisto saldhig ciidan iyo deked ganacsi.
Itoobiya oo aan bad lahayn ayaa muddo dheer raadinaysay marinkeeda badda, balse tallaabadaas ayaa ka cadhaysiisay Soomaaliya oo diiday inay aqoonsato madax-bannaanida Somaliland oo ay markii ugu horreysay ku dhawaaqday 1991-kii, isla markaana aan helin wax taageero ah oo caalami ah.
“Soomaaliya hadda waxa ay wajahaysaa khatar xooggan oo kaga imanaysa falalkii ugu dambeeyay ee Itoobiya oo si badheedh ah ugu xad-gudbay madax-bannaanida dhulkeenna,” ayuu Ra’iisal Wasaare Xamza Cabdi Barre ka sheegay Golaha Guud ee Qaramada Midoobay.
“Isku dayga Itoobiya ay ku doonayso inay ku qabsato qayb ka mid ah Soomaaliya iyadoo ku gabbanaysa inay sugayso marin-badeedka badda waa mid sharci-darro ah oo aan loo baahnayn,” ayuu yidhi.
“Heshiisyo kuwan la mid ah waxaa lagu soo afmeeray dowlado kale, mana jirto sabab ay dowladda Soomaaliya u hurin karto colaado sida muuqata ay ku dooneyso in lagu daboolo xiisadaha siyaasadeed ee gudaha ka jira,” ayuu u sheegay Golaha Guud ee Qaranka.
Iyadoo laga jawaabayo qorshaha Itoobiya, Soomaaliya waxay ku hanjabtay inay meesha ka saarayso ciidamada Itoobiya ee loo dirayo howlgalka Midowga Afrika ee ka dhanka ah xoogagga Al-shabaab tan iyo sannadkii 2007-dii.
Muqdisho ayaa sidoo kale heshiis milateri la gashay Qaahira oo ay Soomaaliya ka heshay shixnado hub ah, taasoo ka werwersisay Itoobiyaanka oo sheegay in hubkaas uu gacanta u galo Al-shabaab.
Howlgalka Midowga Afrika ayaa lagu wadaa dhamaadka sanadkan in isbedel lagu sameeyo, waxaana Masar ay markii ugu horeysay soo bandhigtay booskii ciidamada Itoobiya.
Sidoo kale waxaa laga yaabaa in Soomaaliya ay ku qasbi karto Itoobiya in ay ka saarto ciidamada lagu qiyaasay 10,000 ee ay soo dhoobtay xadka ay wadaagaan si ay uga hortagaan duulaanka kaga imaanaya Islaamiyiinta.
