Agaasimaha Isgaarsiinta ee Madaxtooyada Dowlad Goboleedka Jubbaland Maxamed Xasan Xiis, ayaa ku eedeeyay Madaxtooyada Somaliya inay maalgelisay olole lagu aflagaadeeyay Madaxweynaha Jubbaland, Axmed Madoobe oo lagu sameeyay baraha bulshada.
Xiis ayaa ku andacoonaya in C/qaadir Cali Dige oo ah Agaasimaha Isgaarsiinta ee Villa Somalia uu soo agaasimay dacaayad laga faafiyay baraha bulshada oo lagu doonayay in lagu sumcad dilo Madaxweyne Madoobe.
“Madaxweyne, weli rajo ma ka qabtaa ergada aad u direyso inay xalliyaan khilaafka jira, iyadoo Agaasimahaaga Warfaafinta iyo Xafiiskaagu ay lacag ku bixinayaan cayda iyo dacaayad ka dhan ah madaxda aad ku casuuntay shirka madasha? Xiis ayaa hadalkiisa ku daray isagoo soo xiganaya qoraal la sheegay inuu Dige u diray faafinta ololaha.
Eedeymahan ayaa kusoo aadaya xilli magaalada Muqdisho uu ka socdo shirka golaha wadatashiga qaran ee u dhaxeeya madaxda dowladda federaalka iyo kuwa maamul goboleedyada, kaasi oo galay maalintiisii shanaad. Madaxweyne Madoobe ayaa ka horyimid in dowladda Federaalka ay wado doorasho qof iyo cod ah, isagoo u ololeynaya doorasho dadban oo la mid ah tii Jubbaland ka dhacday 2019-ka.
Dowladda Federaalka oo ay ugu horreeyaan Madaxweyne Xasan Sheekh Maxamuud iyo Ra’iisul Wasaare Xamza Cabdi Barre, ayaa u ololeynaya in doorasho mideysan oo hal qof iyo cod ah ay ka dhacdo guud ahaan Soomaaliya, taasoo uu Madoobe diidan yahay.
Dhanka kale, C/raxmaan Xudeyfi, Afhayeenka Madaxweynaha, ayaa ku tilmaamay shirarka NCC inay si habsami leh u socdaan, lana filayo in la gaaro heshiis siyaasadeed oo wadajir ah, kaasoo qayb ka qaadanaya dadaallada lagu dhisayo dowladnimada Soomaaliya. “Kulamada NCC waxay u socdaan si habsami leh, iyadoo aysan jirin wax caqabad ah, waxaana rajeyneynaa in dhawaan lagu dhawaaqo go’aamo wax ku ool ah,” ayuu yiri Xudeyfi.
Shirka NCC ayaa la filayaa in la soo gaba gabeeyo maanta oo Axad ah, iyadoo la filayo in laga soo saaro go’aamo muhiim ah oo la xiriira hanaanka doorashada Soomaaliya iyo dowladnimada.
