Madaxweyne Xasan Sheekh Maxamuud ayaa Madaxtooyada Soomaaliya kula kulmay Jimcihii Safiirka Jarmalka u fadhiya Soomaaliya, Sebastian Groth oo ay ka wada hadleen ballaarinta doorka Jarmalku ka qaadanayo taageeridda dadaallada dowlad dhisidda Soomaaliya. Doodaha ayaa waxaa ugu muhiimsanaa in diiradda la saaro dib-u-soo-nooleynta barnaamijyada tababarka xirfadaha ee muhiimka u ah horumarka waara ee Soomaaliya iyo xasilloonida dhaqaale.
Madaxweyne Maxamuud ayaa hoosta ka xarriiqay baahida loo qabo in Jarmalku uu sii wado kaalmeynta dhinacyada muhiimka u ah horumarka Soomaaliya, iyadoo tababarrada farsamada gacanta ay soo ifbaxayaan mudnaanta koowaad. Waxa uu carrabka ku dhuftay in barnaamijyada tababarrada ee xirfadda leh aysan kaliya caawin doonin dhimista shaqo la’aanta balse ay sidoo kale siin doonaan waddo loo maro isku-kalsoonaan dhaqaale, gaar ahaan dhallinyarada Soomaaliyeed. “Dib-u-soo-nooleynta tababarrada farsamada gacanta waxay lama huraan u tahay abuurista fursado waara iyo dhisidda bulsho xasilloon,” Madaxweyne Maxamuud ayaa xusay.
Amb. “Jarmalka waxa uu u heellan yahay dhismaha dowladnimada Soomaaliya iyo dadaallada dimuqraadiyeynta ah, waxaana u aragnaa in tababarka farsamada gacanta uu qeyb muhiim ah ka yahay safarkaas,” ayuu yiri danjire Groth, sida lagu sheegay war-saxaafadeed ka soo baxay Villa Somalia.
Kulanka ayaa sidoo kale lagu muujiyay iskaashiga xooggan ee ka dhexeeya Soomaaliya iyo Jarmalka, iyadoo labada dowladood ay ka go’an tahay horumarinta hannaanka dimuqraadiyeynta iyo horumarinta Soomaaliya. Iyadoo Soomaaliya ay wali wajaheyso caqabado amni iyo kuwo dhaqaale, taageerada Jarmalka ee dhanka tababarada xirfadaha waxay la jaan qaadaysaa dadaallada ballaaran ee caalamiga ah si loo abuuro waddooyin korriin waara iyo isku filnaansho.
