Ciidamada Nabad Suggida Jubbaland ayaa Hubka lidka Diyaaradaha ku garaacay Diyaarad siday Shixnad Milateri oo u socotay Ciidamo ka tirsan Dowladda Federaalka Soomaaliya oo ku sugneyd Raaskambooni ee Gobolka Jubbada Hoose.
Sida lagu sheegay war qoraal ah oo ka soo baxay Maamulka Jubbaland Jimcihii, Diyaaradda oo ka duushay Garoonka Aadan Cadde ee Magaalada Muqdisho, ayaa lagu khasbay inay u leexato dhanka xuduudka Kenya, ka dib markii ay si dirqi ah kaga hortagtay rasaasta lidka diyaaradaha ee Jubbaland. War saxaafadeedka ayaa lagu eedeeyay in diyaaraddu ay qalab geysay ciidamo ka tirsan dowladda federaalka oo dhawaan la geeyay deegaanka lagu dagaalamay.
“Ciidamada Jubbaland ayaa rasaas ku furay diyaaradda abaare 5:20 galabnimo, diyaaraddu waxay ka carartay halkii ay rabeen inay ku dagto, waxayna ku degtay meel u dhow xuduudka Kenya, wayna ka badbaadday dabkii naga furnaa,” ayaa lagu yiri qoraalka.
Ciidamada Jubbaland ayaa la sheegay inay fariisimo ka sameysteen agagaarka degmada Raaskaambooni, waxaana taasi ay keentay cabsi laga qabo isku dhac dhexmara ciidamada ammaanka ee gobolka iyo kuwa dowladda Federaalka. TV-ga Jubbaland ayaa sheegay in maamul goboleedkaasi uu ku eedeeyay dowladda Federaalka in ay soo dirtay ciidamo qalqal galiyay amniga Jubbaland, waxa ayna wacad ku mareen in ay ka hortagi doonaan ciidamadan la soo daabulay.
Dowladda Federaalka, oo aan weli ka hadlin dhacdadan, ayaa dhawaan in ka badan 1,000 askari ah dhigtay Jubbada Hoose, si ay mas’uuliyadaha ammaanka ugala wareegaan howlgalka Midowga Afrika ee Ku-meel-gaarka ah ee Soomaaliya (ATMIS) ka hor inta aan la gaarin Janaayo 2025-ka.
Ciidamadan la geeyay magaalada Muqdisho ayaa sii xumeeyay xiriirka ka dhaxeeya Muqdisho iyo Hogaamiyaha Jubbaland Axmed Madoobe. Madoobe ayaa ka horyimid in dowladda Federaalka ay dabada ka riixeyso doorasho “hal qof iyo hal cod ah” sanadka 2026-ka, isagoo taa badalkeeda door biday qaab doorasho dadban, taasoo madaxda federaalka ay diideen.
