Soomaaliya ayaa magaalada Muqdisho ka furatay xabsigii ugu horreeyay oo ay haween keliya ku nool yihiin, waana tallaabo gogol-xaadh u ah dib-u-habaynta caddaaladda ee looga gol-leeyahay in wax lagaga qabto kala-duwaanshiyaha jinsiga ee xabsiyada iyo ilaalinta xuquuqda maxaabiista dumarka ah.
Xaruntan oo ku taal degmada Xamar Jajab ayaa waxaa u qalabeysan in ay hoy u noqoto haweenka lagu soo oogo dambiyada ay ka mid yihiin rabshadaha qoyska, dil, iyo dambiyada la xiriira daroogada. Maaddaama ay tahay xaruntii ugu horreysay ee haween gaar ah oo lagu hayo Soomaaliya, waxay hubisaa in maxaabiistu ay helaan daryeel bini’aadantinimo iyo daryeel xasaasi ah oo jinsiga ah, iyadoo wax ka qabanaysa daldaloolada muddada dheer soo jiray ee nidaamka caddaaladda.
Taliye ku xigeenka Ciidanka Booliska Sareeye Guuto Cismaan C/laahi Maxamed (Kanif) ayaa xariga ka jaray xabsigaasi oo ay ka qeyb galeen saraakiil ka tirsan ciidanka Booliska iyo saraakiil ka tirsan dowladda. Waxa uu ku tilmaamay xarunta in ay tahay tillaabo weyn oo lagu bixinayo adeegyada booliska ee xirfadlayaasha ah iyo kuwa xasaasiga ah, taas oo calaamad u ah bog cusub oo sharci fulinta Soomaaliya ah.
Xafladan ayaa waxaa sidoo kale hadal ka jeedisay Taliyaha Saldhiga Degmada Xamar Jajab Raxma Sandheer oo iyadu hormuud ka ahayd. Sandheer ayaa ku nuuxnuuxsaday muhiimada ay xaruntani u leedahay dhisidda kalsoonida shacabka ee ciidamada ammaanka, isagoo xusay in hab-dhaqannada dadka lagu hayo ee bini’aadminimada ah ay xoojin karaan xiriirka bulshada iyo taageeridda dib-u-habaynta caddaaladda. Waxay intaas ku dartay in mas’uuliyiintu ay xaruntan u arkaan qorshe dib-u-habeyn mustaqbalka ah si loo abuuro hannaan bini’aadantinimo iyo sinnaan oo lagu hayo dalka oo dhan.
