Tibor Nagy, oo hore u ahaa Kaaliyaha Xoghayaha Arrimaha Dibadda ee Mareykanka u qaabilsanaa Afrika, isla markaana soo noqday Danjiraha Mareykanka u fadhiyay dalalka Guinea iyo Itoobiya, ayaa ku dhawaaqay inuu ku laabanayo Wasaaradda Arrimaha Dibadda ee Mareykanka isagoo qabanaya shaqo ku meel gaar ah oo ka baxsan shaqadiisii caadiga ahayd ee arrimaha Afrika.
Nagy, oo ah diblomaasi muddo dheer soo shaqeeyay, isla markaana si cad ugu ololeeya aqoonsiga Somaliland, ayaa warkan ku sheegay bartiisa X (oo hore loo oran jiray Twitter) maalintii Khamiista.
“Saaxiibbadayda qaaliga ah, kuwa iga soo horjeeda, iyo kuwa wax dhaleeceeya – Waxay ila tahay inaan ku laabanayo Wasaaradda Arrimaha Dibadda ee Mareykanka Isniinta, anigoo qabanaya jago ka baxsan arrimaha Afrika oo keliya. Sidaas darteed, waxaan joojinayaa inaan muujiyo aragtidayda shakhsi ahaaneed illaa inta ay ka dhammaanayso jagadayda ku meel gaarka ah (waxay u badan tahay in ay qaadan doonto dhowr bilood). Ilaahay ha idin barakeeyo dhammaantiin, dhawaanna waan soo laaban doonaa!.”
Sida ay sheegeen warbaahinta caalamiga ah, Ergaygii hore ee Mareykanka u qaabilsanaa Gobolka Sahel, Dr. J. Peter Pham, ayaa sidoo kale la sheegay inuu ku laabanayo xafiiska Afrika ee Wasaaradda Arrimaha Dibadda.
Pham ayaa sidoo kale ahaa taageere cod dheer ku hadla oo taageera dadaalka aqoonsi raadinta Somaliland, isagoo si joogta ah ugu dooda qadiyaddan baraha bulshada.
Labada nin ee Nagy iyo Pham ayaa si joogta ah uga soo horjeeday siyaasadda “Soomaali Weyn”, iyagoo ku doodaya in Mareykanku uu luminayo fursado istaraatiiji ah maadaama uusan u aqoonsanayn Somaliland dowlad madax-bannaan. Nagy ayaa horay ugu dooday, “Aqoonsiga Trump ee Somaliland wuxuu dan u yahay Mareykanka.”
Sidoo kale, Pham ayaa iftiimiyay wax uu ugu yeeray guulaha dimuqraadiyadeed ee Somaliland isagoo sheegay in ay xoojinayaan qadiyadda madax-bannaanideeda.
“Doorasho si habsami leh uga dhacda Somaliland, marka lagu daro guulaheeda kale, shaki la’aan waxay xoojin doontaa qadiyadeeda dib-u-eegis siyaasadeed oo dhameystiran,” ayuu yiri Pham, isagoo tixraacayay isbeddellada suurtagalka ah ee siyaasadda arrimaha dibadda ee Mareykanka ee ku aaddan Somaliland.
Labada nin ayaa ololahooda aysan ka aheyn aragti, balse waxay u shaqeeyaan shirkado lobby ah oo lacag ka qaata Somaliland.
Falanqeeyayaasha ayaa sheegaya in Mareykanku uu u baahan yahay inuu si taxaddar leh u maareeyo danahiisa Geeska Afrika. Soomaaliya waxay weli tahay saaxiib istaraatiiji ah, muhiimaddeeda juqraafi-siyaasadeedna waxaa sii xoojiyay iyadoo Shiinaha iyo Ruushka ay muujinayaan xiisaha sii kordhaya ee gobolka.
