Xiisad colaadeed laga dareemayaa magaalada Gaalkacyo, ee xarunta gobolka Mudug, kaddib markii xalay ay is-rasaasayn halkaasi ku dhexmartay maleyshiyaad kasoo kala jeeda labo beel oo ku dagaalamay Galbeedka Mudug.
Israsaasaynta oo ka dhacday xaafadda Garsoor ayay wararku sheegayaan inay ka dhalatay khasaare isugu jira dhimasho iyo dhaawac. Ciidamo ka socday maamulada labada dhinac ayaa ku guulaystay inay xiisadda damiyaan.
Waxaa socda dadaalo looga hortagayo in xiisadda ka taagan galbeedka Mudug ay saamayn ku yeelato magaalada Gaalkacyo. Si colaadda looga hortago, Isimada gobolka Mudug ee Puntland ayaa baaq nabadeed kasoo saaray colaadda u dhaxaysa beelaha Leelkase iyo Sacad ee ku dagaallamaya galbeedka gobolka Mudug.
Isimada ayaa ugu baaqay beelaha diriray in ay khilaafkooda ku xalliyaan wadahadal, isu tanaasul iyo is-qancin. Waxay Isimadu taageero buuxda u muujiyey odayaasha iyo waxgaradka labada dhinac ee dadaalka ugu jira nabadeynta. Waxay isimadu ku taliyeen in shuruud la’aan lagu aqbalo go’aannada nabadeed ee la gaaro.
Waxay sidoo kale bogaadiyeen dadaallada ay maamullada Puntland iyo Galmudug hore ugu bixiyeen xakameynta dagaalladii hore iyo kuwa hadda socda. Isimada ayaa ku dhiirrigeliyey labada maamul in ay muujiyaan mas’uuliyadda ku aaddan nabadda inay sii xoojiyaan.
