Turkiga ayaa Soomaaliya usoo daabulay diyaaradaha casriga ah ee Bayraktar Akinci diyaaradaha aan duuliyaha lahayn ee loo yaqaanno (UCAVs), taasoo fulinaysa ballan-qaad ciidan oo muddo dheer la sugayay si kor loogu qaado howlgallada ka dhanka ah argagixisada ee dalka.
Diyaaradaha dagaalka ee aan duuliyaha lahayn ee Bayraktar Akinci ayaa subaxnimadii Talaadada soo gaaray magaalada Muqdisho, taasoo qeyb ka ah kaalmada milateri ee Turkiga uu siiyo Soomaaliya. Diyaaradahaan ayaa la filayaa in ay sare u qaadaan awooda howlgallada Ciidanka Xoogga Dalka Soomaaliyeed ee lagu beegsanayo Al-Shabaab. Marka la barbar dhigo dayuuradaha aan duuliyaha lahayn ee Bayraktar TB2, Akinci waxay ku faantaa adkeysi weyn, nidaamyo ilaalineed oo horumarsan, iyo awoodda lagu sameeyo weerarrada saxda ah ee fog-fog. Waxa ay haysataa ugu badnaan 1,500 kiiloogaraam, taas oo u oggolaanaysa in ay qaado hub kala duwan, oo ay ku jiraan gantaallada SOM cruise missiles, gantaallada hawada-ilaa-hawada ee Gökdoğan, bambooyinka la hago ee Bozok, iyo bambooyinka MK-82.
Wasiirka Gaashaandhigga Soomaaliya Mudane Cabdulqaadir Maxamed Nuur (Nuur) oo xilka ka degaya ayaa ku tilmaamay ciidamadan loo dirayo Soomaaliya “gargaar ciidan oo aan horay loo arag”, isagoo carrabka ku adkeeyay sida hagar la’aanta ah ee Turkiga ay uga go’an tahay taageerada dadaallada amniga Soomaaliya. Diyaaradahaan ayaa la filayaa in ay sare u qaadaan awooda Ciidanka XDS si ay u sameeyaan duqeymo sax ah iyo in ay carqaladeeyaan howlgallada ay maleegayaan, taasi oo ah horumar muhiim ah oo laga gaaray dagaalka ka dhanka ah Al-Shabaab.
Turkiga ayaa sanadihii ugu dambeeyay ahaa saaxiibka muhiimka ah ee Soomaaliya, isaga oo bixinaya tababaro ciidan, taageero kaabayaasha dhaqaalaha, iyo agabka difaaca si loo xoojiyo ciidamada ammaanka dalka. Soo gelinta diyaaradaha aan duuliyaha lahayn ee Akinci waxay astaan u tahay tallaabo muhiim ah oo lagu sii xoojinayo iskaashigan milateri iyadoo la xoojinayo saameynta istaraatiijiyadeed ee Turkiga ee Geeska Afrika.
Falanqeeyayaasha ayaa sheegaya in ku kordhinta UCAV-yadan horumarsan aysan kaliya hagaajin doonin waxtarka howlgallada ciidamada Soomaaliya balse ay sidoo kale qeyb ka qaadaneyso hadafka ballaaran ee xasilinta dalka iyadoo la xakameynayo hamiga dhuleed ee Al-Shabaab.
