Tirada dagaalyahanada Daacish ee ku sugan Waqooyiga Soomaaliya, gaar ahaan deegaanada Puntland ayaa ku dhawaad laba jibaarmay sanadkii lasoo dhaafay, sida lagu sheegay war ka soo baxay Taliska Mareykanka ee Africa ee AFRICOM. General Michael Langley, oo ah madaxa AFRICOM, ayaa walaac ka muujiyay joogitaanka Ururka Daacish, oo sidoo kale loo yaqaano Daacish, ee ku sugan deegaanadaasi.
Gen. Langley oo la hadlay Idaacadda Codka Mareykanka (VOA) ayaa iftiimiyay Awoodda Daacish ee ku sii kordhaysa Gobollada Waqooyi ee Soomaaliya, isagoo ku macneeyay in Kooxda Daacish ay si weyn u ballaarisay cagtooda, isla markaana ay laba jibaartay awoodooda marka loo eego 2023. Wararka ayaa sheegaya in tirada dagaalyahanada Daacish ee ku sugan Puntland ay gaarayaan ilaa 200 oo dagaalyahan.
Kor u kaca dagaalyahanada Daacish ayaa khatar hor leh ku ah xasiloonida gobolka, iyadoo AFRICOM ay si gaar ah uga walaacsan tahay suurtagalnimada in dagaalyahanno shisheeye ah ay ku soo qulqulaan gobolka. Gen. Langley ayaa ku nuux nuuxsaday in Daacishta ku sugan waqooyiga Soomaaliya ay soo jiidan karaan dagaalyahano badan oo dibadda ah, taasoo sare u qaadaysa walaaca laga qabo awooda kooxda ee khalkhal galinta xasiloonida Geeska Afrika iyo in ay xiriir la leedahay kooxaha kale ee Jihaad doonka ah.
Mar wax laga weydiiyay hoggaanka Daacish ee caalamka iyo doorka Abaadir Mu’min, oo ah muwaadin Soomaali ah, Langley waxa uu qiray in wararka sheegaya in Mu’min uu yahay hoggaamiyaha Daacish ay noqon karaan kuwo lagu kalsoonaan karo. Muumin oo si weyn uga dhex muuqday howlgallada Daacish ee Soomaaliya ayaa la sheegay in uu saameyn ku yeeshay ururka argagixisada.
Kobcinta Daacish ee Puntland ayaa caqabad weyn ku ah howlgallada ka dhanka ah argagixisada ee ka socda Soomaaliya, halkaasoo Mareykanka uu si firfircoon uga qeyb qaatay taageerada ciidamada Soomaaliya iyo fulinta howlgallada ka dhanka ah argagixisada. Marka laga soo tago khatarta Al-Shabaab, soo noqoshada Daacish ayaa sii adkeynaysa dadaallada lagu doonayo in lagu xasiliyo dalka oo muddo dheer ay hareeyeen kacdoono iyo qalalaaso siyaasadeed.
