Wasiirka Qorsheynta Soomaaliya, Mudane. Maxamuud Beenebeene, ayaa sheegay in 68.7 Milyan oo Doollar oo ah deeqda horumarineed ee dhawaan ka timid Hay’adda Maraykanka u qaabilsan Horumarinta Caalamiga ah (USAID) ay inteeda badan sabab u tahay horumarka la taaban karo ee ay Soomaaliya ka samaysay hawlgallada ka dhanka ah argagixisada. Wasiirka oo Talaadadii la hadlay Warbaahinta gudaha ee Magaalada Muqdisho, ayaa ku nuux-nuux saday in kaalmadan lacageed ay xoojin doonto adeegyada muhiimka ah ee loo fidinaayo goobaha cusub ee la xoreeyay, oo ay ciidamada Somaliya ku guuleysteen inay ka saaraan kooxaha xagjirka ah sida Al-Shabaab iyo Daacish.
Wasiirka Qorsheynta ayaa dowladda Mareykanka uga mahad celiyay taageerada joogtada ah ee ay la garab taagan tahay arrimaha mudnaanta u leh qaranka Soomaaliya, sida uu hadalka u dhigay maamulka Madaxweyne Xasan Sheekh Maxamuud. Waxyaabaha mudnaanta leh waxaa ka mid ah dib u habeynta maamulka, kobaca dhaqaalaha, caafimaadka, waxbarashada, iyo awood siinta haweenka iyo dhalinyarada. Deeqdan ayaa sidoo kale loo arkaa mid muhiim u ah aragtida fog ee Soomaaliya ee adkeysiga iyo joogteynta.
Maraykanku wuxuu had iyo jeer ahaa saaxiibka muhiimka ah ee dagaalka lagula jiro argagixisada iyo dadaalkayaga ku aaddan xasilinta meelaha cusub ee la xoreeyay anagoo bixinayna adeegyada muhiimka ah. Deeqdani waxay xoojin doontaa awooddayada si aan u sii wadno guulahaas iyo in aan hubinno in meelaha laga xoreeyay xakamaynta xagjirnimada ay ka faa’iidaystaan nabadda iyo horumarka,” Mudane. Beenebeene ayaa hadalka ku tiri mar uu wareysiga bixinayay.
Horumarkan ayaa daba socda hawl-galyo xiriir ah oo caalami ah oo looga gol-leeyahay in lagu wanaajiyo ajendaha amniga iyo horumarka Soomaaliya. Todobaadyadii la soo dhaafay, Wasiiru Dowlaha Arrimaha Dibadda Soomaaliya, Cali Cumar Balcad, ayaa ka qeyb galay shirka Isbaheysiga Caalamiga ah ee looga adkaaday Ururka Daacish oo ka dhacay Magaalada Washington, isagoo hoosta ka xariiqay muhiimadda ay leedahay iskaashiga caalamiga ah ee burburinta kooxaha argagixisada ah. Sidoo kale, Milliteriga Maraykanka ayaa walaac ka muujiyey joogitaanka dagaalyahannada Daacish ee ku sugan Waqooyiga Somalia, gaar ahaan Puntland, iyadoo sannadkii hore la sheegay inay laba-laabmeen tirada Maleeshiyada.
$68.7 milyan ee deeqda USAID ayaa door muhiim ah ka ciyaari doonta joogteynta dadaallada dowladda Soomaaliya ee lagu sugayo amniga gobollada la xoreeyey, iyadoo la hubinayo in adeegyada sida daryeelka caafimaadka, waxbarashada, iyo horumarinta kaabayaasha ay gaaraan bulshooyinka horay ugu hoos jiray gacanta argagixisada. Horumarka ay xukuumaddu ka samaysay dhinacyadan ayaa qayb ka ah istaraatiijiyad ballaadhan oo lagu soo celinayo xaaladdii caadiga ahayd, laguna dhisi lahaa kalsoonida muwaadiniinta iyo dawladda, tallaabadaas oo aqoonsi iyo taageero caalami ah ku kasbatay.
