Wasiir ku xigeenka wasaaradda warfaafinta, dhaqanka iyo dalxiiska xukuumadda federaalka Soomaaliya Cabdiraxmaan Yuusuf Al-Cadaala oo safar shaqo ku jooga dalka Mareykanka ayaa kulan is xog-wareysi iyo soo dhaweyn iskugu jiray la yeeshay jaaliyadda Soomaaliyeed ee gobolka Ohio, boqolaal ka mid ah Soomaalida ku nool Columbus Ohio ayaa si weyn u soo camiray goobta soo dhoweynta.
Wafdiga Wasiir Cabdiraxmaan Al-Cadaala ee Columbus lagu soo dhaweeyey waxaa qeyb ka ahaa Xoghayaha 1-aad ee safaaradda aan ku leenahay Washington DC Abuukar Xasan Goley iyo Wakiilka Warbaahinta Qaranka ee waqooyiga America Cabdixakiin Cabdi Ismaaciil.
Qaar kamid ah Jaaliyadda ayaa intii kulankaasi socday wasiirka su’aalo ka weydiiyey xaaladda dalka, sidoo kale waxaa jiray kulamo doceedyo ay bulshada qaar la yeesheen wasiir Cabdiraxmaan Al-Cadaala.
Ugu dambeyntii Wasiir ku xigeenka wasaaradda warfaafinta Soomaaliya Cabdiraxmaan Yuusuf Al-Cadaala oo jaaliyadda uga mahadceliyey soo dhaweynta ay wafdigiisa ugu sameeyeen Columbus Ohio ayaa uga warbixiyey xaaladda guud dalka iyo dadaallada soo kabashada dowladnimada ku saabsan ee Soomaaliya ka socda.
