Wakiilo ka kala socda Dowladda Federaalka Soomaaliya, Qaramada Midoobay, Midowga Afrika iyo dalalka ay ciidamada ka joogaan Soomaaliya ee qeybta ka ah howlgalka Midowga Afrika ee Soomaaliya (AUSSOM) ayaa lagu wadaa in ay dhawaan kulmaan si ay uga wada hadlaan qorshaha kala guurka ah ee howlgalka. Diyaargarowgu wuxuu ujeedkiisu yahay in la bilaabo shirar ka hor bartamaha Noofembar, taasoo u oggolaanaysa dhammaan dhinacyada ay khuseyso inay dejiyaan tallaabooyin muhiim ah oo loogu talagalay howlgalka lagu beddelayo Hawlgalka Ku-meel-gaarka ah ee Midowga Afrika ee Soomaaliya (ATMIS).
Sida ay sheegayaan ilo-wareedyo la hadlay Mustaqbal, wada-hadallada waxaa ka mid ah codsiyo ka yimid dalal cusub oo daneynaya inay ku biiraan AUSSOM, iyadoo ay barbar socoto la-tashiyo ku aaddan sidii ciidamada ay si hufan isaga kaashan lahaayeen si loo gaaro ujeeddooyinka muhiimka ah ee howlgalka.
La-taliyaha dhanka ammaanka ee Madaxweynaha Soomaaliya, Xuseen Sheekh Cali, ayaa si firfircoon ula kulmaya wakiilada Qaramada Midoobay iyo Midowga Afrika, si uu ugu gogol xaaro howlgalkan cusub.
Si ka duwan kuwii ka horreeyay, ATMIS iyo AMISOM, AUSSOM waxay diri doontaa ciidan ka yar oo bartilmaameedsan si ay si dhow ula shaqeeyaan Ciidanka Qaranka Soomaaliyeed. Habkan ayaa looga dan leeyahay in lagu xoojiyo awoodda amniga Soomaaliya iyo in ugu dambeyntii loo diyaariyo ciidamada Soomaaliya si ay si buuxda u qaataan mas’uuliyadda amniga qaranka mustaqbalka dhow.
Soomaaliya waxa ay iska taagtay mowqif adag oo ku saabsan ku lug lahaanshaha Itoobiya ee howlgalka cusub, iyadoo ku sababeysay falkii Addis Ababa ee dhawaanahan ku kacayay xad gudub ku ah madax banaanida, midnimada, iyo wadajirka dhuleed ee Soomaaliya. Walaacaas darted, Soomaaliya waxay qorsheyneysaa in ay Itoobiya ka saarto AUSSOM.
Wada-hadallada soo socdaa waxay muujinayaan tallaabo muhiim ah oo laga qaaday isbeddelka amniga ee Soomaaliya, iyadoo dhammaan dhinacyada ay ka go’an tahay xaqiijinta guusha howlgalka ee xoojinta amniga iyo horumarinta waddada Soomaaliya ee xasilloonida iyo isku-kalsoonaanta.
