Uganda ayaa si rasmi ah u shaacisay qorshe ay ciidamadaheeda uga bixinayaan Soomaaliya kadib 19 sano oo joogto ah oo ay ku jireen howlgallada nabad ilaalinta, taasoo calaamad u ah isbeddel weyn oo ku yimaada doorka dalkaasi ee ammaanka gobolka.
Qoraal kooban oo uu soo dhigay barta X ee horey loogu yaqiinay Twitter, General-ka Taliyaha Guud ee Ciidamada Uganda, Muhoozi Kainerugaba, ayaa lagu xaqiijiyey in howlgalkii ciidamada Uganda ee Soomaaliya uu gaaray gabagabo, islamarkaana diyaar garowga lagu bilaabi doono in ciidamadu si buuxda uga baxaan dalka.
“Kadib 19 sano oo aan joognay Soomaaliya, waxaan damacsanahay in si buuxda looga baxo dalkaasi waqti dhow,” ayuu yiri General Muhoozi.
Ciidamada Uganda ayaa ah kuwa ugu tirada badan ee ka tirsan Howlgalka Taageerada iyo Xasilinta Midowga Afrika ee Soomaaliya (AUSSOM), kuwaas oo muhiim u ahaa la dagaalanka kooxda Al-Shabaab.
Waxa lagu qiyaasaa in hadda Soomaaliya ku sugan yihiin 5,000 ilaa 6,000 oo askari oo ka tirsan ciidanka Uganda, kuwaasoo door muhiim ah ka ciyaara ilaalinta kaabayaasha dowladda sida Garoonka Caalamiga ah ee Aden Adde, Dekedda Muqdisho, iyo goobo istiraatiiji ah oo kale.
Uganda ayaa tan iyo 2007 kaalin muuqata ka ciyaartay dadaallada caalamiga ah ee nabad ilaalinta Soomaaliya, iyadoo bixisay shaqaale milatari iyo hoggaan, una adeegay howlgalada ay hoggaamiso Midowga Afrika si loo xasiliyo dalka iyo in la taageero ciidamada amniga Soomaaliya.
Illaa hadda, lama shaacin waqti rasmi ah oo ay ciidamadu ka bixi doonaan Soomaaliya, waxaana weli caddayn la’aan ah sida tallaabadan ay u saameyn doonto howlgalada AUSSOM iyo guud ahaan xaaladda amni ee dalka Soomaaliya.
