Tuulooyinka ku teedsan magaalada Beledweyne ee gobolka Hiiraan ee bartamaha dalka Soomaaliya ayaa waxaa ka taagan fatahaad uu sameeyay wabiga shabeele .
Daadadku waxa ay baabi’iyeen dhul beereed aad u ballaadhan taas oo keentay in tiro badan oo beeralay ah ay la daalaa dhacayaan khasaaraha baaxadda leh.
Roobab mahiigaan ah oo ka da’ay gobolka ayaa sababay in wabiga Shabeelle uu buux dhaafiyo islamarkaana uu biyo fariisto sidoo kale waxa uu biyo dhigay dhul beereed aad u badan.
Dalagyadii u diyaarsanaa ayaa la daadiye taas oo meesha ka saartay il nololeed oo aad u adag oo ay ku noolaayeen qoysas badan oo ku tiirsanaa tacbashada iyo dhaqaalaha.
Dadka deegaanka ayaa ku waramaya in daadadku ay barakiciyeen boqolaal ka mid ah dadka deegaanka taasoo ku qasabtay in ay gabaad u raadsadaan magaalooyinka u dhow ama xeryo ku meel gaar ah Burburinta dhul-beereed oo ay weheliso luminta xoolaha, ayaa sii kordhisay walaaca laga qabo sugnaanshaha cuntada ee gobol markii horeba nugul.
Ururada bini’aadantinimada ayaa wada abaabul si ay wax uga qabtaan dhibaatooyinka laakiin gaaritaanka meelaha ay dhibaatadu saameysey ayaa ah caqabad weyn sababtoo ah kaabayaasha burburay iyo roobabka socda.
Dadaalka gargaarka ayaa diiradda saaraya sidii cunto, biyo nadiif ah, iyo hoy degdeg ah loo heli lahaa qoysaska barokacay iyadoo la qiimeynayo baahiyaha soo kabashada muddada dheer ee gobolka.
Gobolka Hiiraan ayaa soo food saartay abaaro iyo fatahaado isdaba joog ah oo soo noqnoqday sanadihii ugu dambeeyay, taasoo muujineysa baahida degdega ah ee loo qabo xalal waara oo lagu maamulo biyaha si loo yareeyo musiibooyinka mustaqbalka. Hogaamiyayaasha maxalliga ah ayaa ku baaqay in la kordhiyo taageerada dowladda Soomaaliya iyo saaxiibada caalamiga ah si wax looga qabto dhibaatada degdegga ah iyo in la maalgashado tallaabooyinka dib-u-dhiska ee bulshooyinka ay dhibaatadu saameysey.
