Xildhibaano ka tirsan Baarlamaanka Soomaaliya ayaa wada Mooshin ay Xasaanadda kala noqonayaan 25 Xildhibaan oo lagu eedeeyay in ay taageersan yihiin joogitaanka Ciidamada Itoobiya ee dalka.
Mooshinkan oo ay soo diyaariyeen ku dhawaad 40 Xildhibaan oo ka tirsan Aqalka Hoose ayaa waxaa lagu bartilmaameedsanayaa Xildhibaanno la sheegay inay taageersan yihiin Mudaaharaadyo lagu xaglinayo Ciidamada Itoobiya ee ku sugan Gobolka Bakool.
Dibadbaxan oo ka dhacay labo degmo oo ka tirsan Bakool ayaa waxaa ka dhashay walaac ku saabsan qaranimada iyo doorka ciidamada shisheeye ee ku sugan Soomaaliya. Dadka mooshinka wada ayaa ku doodaya in ficilada mudanayaasha baarlamaanka ay si toos ah u wiiqayaan madax banaanida Soomaaliya.
Madaxweyne Xasan Sheekh Maxamuud ayaa xilkii ka qaaday Xildhibaan Cabdirashiid Maxamed Nuur Jiilley oo ahaa Ergayga gaarka ah ee Madaxweynaha ee Arrimaha Caafimaadka iyo Nafaqeynta. Xildhibaan Jilley oo ka mid ah Xildhibaanada taageersan Ciidamada Itoobiya ayaa ka mid ah Xildhibaanada Mooshinka laga keenay.
Iyadoo ay jirto xaalad deg deg ah ayaa hadana mooshinkan si rasmi ah loogu gudbin Gudoomiyaha Baarlamaanka Aadan Madoobe. Si kastaba ha ahaatee, wararka ayaa sheegaya in Xildhibaanada Mooshinka wada ay ku cadaadinayaan Guddoonka Baarlamaanka inuu horgeeyo si looga doodo.
Iyadoo laga jawaabayo xiisada isa soo tareysa, ayaa Gudoomiye Madoobe wuxuu baajiyay kulankii Baarlamaanka ee Isniintii, taasoo dhalisay hadal heyn ku aadan in Madaxtooyadu ay taageerto tallaabada xasaanada looga qaadayo Xildhibaanada.
Ilaa iyo hadda ma jiro war rasmi ah oo ka soo baxay xisbiyada mucaaradka ah ee ku aadan mooshinka laga keenay 25-ka xildhibaan ee taageeraya ciidamada Itoobiya.
Hadii mooshinkan uu guulaysto, waxa uu tusaale u noqon karaa sida loo maareeyo khilaafaadyada ka dhex jira dowladda Soomaaliya, taasoo keeni karta in cadaadis ballaaran lagu saaro xildhibaanada ka soo horjeeda mowqifka maamulkaasi ee ku lug lahaanshaha ciidamada shisheeye.
