Hay’adda caalamiga ah ee International Press Institute (IPI) ayaa muujisay walaac xooggan oo ku saabsan waxa ay ku tilmaamtay weerarro sii kordhaya, xarig, handadaad iyo caburin loo geysanayo saxafiyiinta Soomaaliyeed, gaar ahaan bishii May 2026.
War-saxaafadeed ay hay’addu soo saartay ayaa lagu sheegay in xaaladda xorriyadda saxaafadda Soomaaliya ay sii xumaaneyso xilli dalka ay ka socdaan doorashooyinka goleyaasha deegaanka iyo doodaha siyaasadeed ee ku saabsan muddo xileedka dowladda iyo geeddi-socodka dimuqraadiyadda.
IPI iyo hay’adaha la shaqeeya ayaa sheegay inay diiwaangeliyeen kiisas badan oo la xiriira weerarro lagu qaaday wariyeyaal, oo ay ku jiraan kuwa ka shaqeeya arrimaha deegaanka iyo isbeddelka cimilada, iyo sidoo kale cadaadis la sheegay in lagu hayo warbaahinta ka hadasha barakicinta dadka rayidka ah.
IPI ayaa ugu baaqday beesha caalamka iyo saaxiibbada Soomaaliya inay kordhiyaan cadaadiska lagu saarayo dowladda si loo ilaaliyo saxafiyiinta loona xaqiijiyo isla xisaabtan dhab ah oo ku saabsan tacaddiyada ka dhanka ah warbaahinta.
Hay’addu waxay sheegtay in weerarrada joogtada ah ee lagu hayo saxaafadda madaxa bannaan ay halis ku yihiin ka qeybgalka dimuqraadiyadeed iyo kalsoonida shacabka, isla markaana loo baahan yahay tallaabo degdeg ah oo lagu difaacayo xorriyadda hadalka iyo madaxbannaanida warbaahinta Soomaaliya.
