Dowlad Goboleedka Jubbaland ayaa bogaadiyay howlgallada ka dhanka ah Al-Shabaab ee ka socda qeybo ka mid ah deegaanada Hir-Shabeelle.
War saxaafadeed ka soo baxay Madaxtooyada Dowlad Goboleedka Jubbaland ayaa waxaa loogu mahadceliyey Ciidanka Xoogga Dalka Soomaaliyeed iyo Ciidamo isku dhaf ah oo deegaanka ah oo loo yaqaano Macawisley oo dadaal badan u galay sidii ay uga xoreyn lahaayeen deegaanada ay gacanta ku hayaan maleeshiyaadka.
War-saxaafadeedka ayaa lagu sheegay in wada shaqeyn dhexmarta ciidamada dowladda federaalka iyo maleeshiyaadka deegaanka ay tahay tallaabo muhiim ah oo lagu gaarayo guulihii ugu dambeeyay ee Al-Shabaab.
Maamulka Jubbaland ayaa carabka ku dhuftay in ay lagama maarmaan tahay in la iska kaashado sidii loo sugi lahaa deegaanada wali ku harsan gacanta kooxda.
Howlgallada ciidamada Hir-Shabeelle ayaa todobaadyadii lasoo dhaafay sii xoogeystay, iyadoo ciidamada dowladda oo garab ka helaya kooxaha iska caabinta deegaanka ay qaadeen weeraro ballaaran. Ciidamada Xoogga dalka Soomaaliyeed iyo dagaalyahanada Macawiisley ayaa wada abaabul xoogan oo ay ku doonayaan in ay dib ugu soo ceshadaan goobo istiraatiiji ah.
Madaxda Jubbaland ayaa si buuxda u taageeray duullaanka lagu soo qaaday, waxayna carrabka ku adkeeyeen muhiimadda ay leedahay in la joogteeyo cadaadiska lagu hayo Al-Shabaab inta laga xoreynayo dhammaan gobollada dalka.
Bayaanka ayaa sidoo kale hoosta ka xariiqay dadaalka ballaaran ee qaran ee lagu doonayo in Soomaaliya looga sifeeyo khataraha xagjirka ah iyo soo celinta xasiloonida.
Howlgallada ka socda Hir-Shabeelle ayaa muujinaya weji muhiim ah oo lagula dagaallamayo Al-Shabaab, iyadoo dardargelin lagu sameynayo dib u soo celinta deegaanno hor leh.
Ciidamada Soomaalida oo ay wehliyaan maleeshiyo beeleedyada ayaa sii wada in ay horay u sii socdaan, iyaga oo muujinaya adkeysi iyo sida ay uga go’an tahay hadafkooda ah in ay ka adkaadaan maleeshiyaadka.
