Madaxweynaha Soomaaliya, Xasan Sheekh Maxamuud ayaa shir ka dhinac socday shir madaxeedka Shiinaha iyo Afrika oo Khamiistii ka furmay magaalada Beijing ee xarunta dalka Shiinaha, waxaa diiradda lagu saaray sidii kor loogu qaadi lahaa iskaashiga ka dhaxeeya Soomaaliya iyo Shiinaha ee dhanka dhaqaalaha buluugga ah.
Wasiirka Kalluumeysiga iyo Dhaqaalaha Buluugga ah, Axmed Xasan Aadan, ayaa faah faahin ka bixiyay dadaallada ay dowladdu waddo ee lagu horumarinayo dhaqaalaha Buluugga ah, wuxuuna caddeeyay in loo baahan yahay in la casriyeeyo kaabayaasha kalluumeysiga.
Madaxda Shiinaha iyo Soomaaliya ayaa ku nuuxnuuxsaday maalgashiga suurtagalka ah ee Shiinuhu ku samaynayo kaabayaasha badda ee Soomaaliya, oo ay ku jiraan dekedo casri ah iyo agabka lagu farsameeyo kalluunka, kuwaas oo lagama maarmaan u ah horumarinta warshadaha kalluumeysiga ee dalka.
Labada dal waxay sidoo kale sahmiyeen suurtagalnimada hindise cilmi-baaris oo wadajir ah si loo ilaaliyo oo si fiican loo fahmo nidaamka deegaanka badda ee Soomaaliya. Shiinuhu waxa uu ballan qaaday in uu Soomaaliya ku taageerayo kaalmo dhaqaale, khibrad farsamo, iyo barnaamijyo karti-dhis ah.
Wadahadallada ayaa dhacay iyadoo qayb ka ah Madasha Iskaashiga Shiinaha iyo Afrika, halkaasoo ay isugu yimaadeen in ka badan 50 waddan oo Afrikaan ah.
Madaxweynaha Shiinaha Xi Jinping ayaa ku dhawaaqay qorshe uu ku bixinayo ku dhawaad 51 bilyan oo doolar oo maalgelin ah muddo saddex sano ah si loo taageero kaabayaasha, shaqo abuurka, iyo hindisayaasha dhaqaale ee guud ahaan Afrika, taasoo xoojinaysa saamaynta sii kordheysa ee Shiinaha ee qaaradda.
.
