Magaalada Baydhabo ayaa maanta wajahday dagaal culus oo ka dhacay gudaha magaalada iyo duleedkeeda, iyadoo iska horimaadyo xooggan ay dhexmareen ciidamo taabacsan Cabdicasiis Xasan Maxamed Laftagareen iyo ciidamada Dowladda Federaalka Soomaaliya iyo kuwa taageersan dhinaca uu hoggaamiyo Sheekh Aadan Madoobe
Dagaalka ayaa billowday saacadihii hore ee aroornimada, waxaana magaalada laga maqlayay rasaas xooggan iyo hub culus, iyadoo xaaladda amni ay si weyn u kacsanayd
Ciidamada taabacsan Laftagareen ayaa la sheegay inay weerar dhowr jiho ah ku qaadeen magaalada, waxaana dagaalku uu gaaray qeybo kala duwan oo Baydhabo ah
Dagaalka ayaa saameeyay xaafado dhowr ah oo ka tirsan magaalada Baydhabo, waxaana ka mid ah Towfiiq, Bukriyey, Baalyaale, Alfaras, Boonkaay iyo Al-Axmaar
Dadka deegaanka ayaa sheegay in rasaas iyo qaraxyo xooggan laga maqlayay goobaha uu dagaalku ka socday, iyadoo shacabka qaar ay guryahooda ku nagaadeen sababo la xiriira cabsi iyo xaaladda amni
Wararka ku saabsan cidda gacanta ku haysa xaafadaha qaar ayaa ahaa kuwo is khilaafsan, iyadoo dhinacyada dagaallamaya ay soo bandhigeen sheegashooyin kala duwan
Wararka soo baxay ayaa sheegay in Dhamme Daahir Macallin Xasan, oo ka tirsanaa ciidamada taageersan Sheekh Aadan Madoobe, lagu dilay dagaalkii maanta ka dhacay Baydhabo
Daahir Macallin Xasan ayaa sida lagu sheegay wararka ahaa taliyaha ilaalada Sheekh Aadan Madoobe
Wararka laga helayo Baydhabo ayaa sidoo kale sheegaya in 12 qof ay ku dhinteen dagaalka, iyadoo ay jiraan tiro kale oo dhaawac ah
Khasaaraha ayaa la sheegay inuu soo gaaray labada dhinac ee dagaallamaya, inkastoo aan weli si rasmi ah loo kala caddeyn tirada ciidamada iyo shacabka ku jira tirada dhimashada
Xarumaha caafimaadka magaalada ayaa la sheegay in loo qaaday dad qaba dhaawacyo kala duwan oo ka dhashay rasaasta iyo iska horimaadka
Maadaama dagaalku uu ka dhacay gudaha magaalada, waxaa jira walaac laga qabo in khasaaraha shacabka uu sii kordho
Wararkii igu dambeeyay ee dagaalka ayaa sheegaya in qaar ka mid ah ciidamadii taabacsanaa Laftagareen ee gudaha u galay magaalada ay dib uga gurteen goobihii ay horey u gaareen
Waxaa sidoo kale la sheegay in ciidamadii dagaalka soo galay ay soo gaareen khasaare dhimasho iyo dhaawac ah
Intii uu dagaalku socday ayaa sidoo kale la soo sheegay in diyaarado dagaal ay dul wareegayeen magaalada Baydhabo
Dhaqdhaqaaqa diyaaradaha ayaa kusoo aadaya xilli magaalada ay ka socdeen iska horimaadyo xooggan, iyadoo aan weli si cad loo xaqiijin ujeeddada duulimaadyadaasi iyo cidda iska leh diyaaradaha
Dowladda Federaalka ayaa dhankeeda sheegaysa in howlgalada milatari ee ka socda Koonfur Galbeed ay la xiriiraan dagaalka ay kula jirto Al-Shabaab, halka dhinaca kale uu dagaalka ku tilmaamayo mid u dhexeeya ciidamada dowladda iyo ciidamo taageersan Laftagareen
Qoysas badan ayaa ku qasbanaaday inay guryahooda ku nagaadaan, halka dadka ku nool xaafadaha ay dagaalladu saameeyeen ay wajahaan khatar la xiriirta rasaasta iyo hubka culus
Waxaa sidoo kale la soo sheegay in guryo rayid ah ay waxyeello soo gaartay, halka qaar ka mid ah goobaha magaalada laga soo sheegay dab
Xaaladda Baydhabo ayaa weli ah mid soo kordheysa, iyadoo xogta dhimashada, dhaawaca iyo burburka ay isbedeli karto inta ay socdaan xaqiijinta iyo warbixinnada ka imaanaya goobaha dagaalka
