Gudoomiyaha Gobolka Banaadir ahna Duqa Magaalada Muqdisho Yuusuf Xuseen Jimcaale Madaale, ayaa la weydiiyay sababta uu u joojin waayay banaanbaxyada ay ka dhigayaan Magaalada Muqdisho.
Yuusuf Madaale waxa uu sheegay in halkii laga joojin lahaa dadka gadoodsan uu door biday in uu la fadhiisto guddi iyaga u wakiil ah, isla markaana ay dhegaystaan tabashadooda, isla markaana wada hadal lagu dhameeyo.
Waxa uu tusaale wax ku ool ah u soo qaatay Bajaajta caanka ku ah wadayaasha Tuktuk oo mudaaharaadyo waaweyn ka dhigay magaalada Muqdisho iyaga oo dhageysanaya cabashadooda iyo in wada hadal lagu xaliyo .
“Intii aan u tagi lahaa bannaanbaxayaasha oo aan kala eryi lahaa, waxaan ka door biday in aan wada hadal ku xalino cabashadooda, anagoo xalinaynay dhammaan cabashooyinkii ay qabeen wadayaasha Bajaajta ee mudaaharaadyada waaweyn ka dhigay magaalada Muqdisho. Waxay soo direen wakiiladooda, waana la fadhiistay in arrinta la xaliyo si sax ah,” ayuu yiri guddoomiyaha gobolka Banaadir ahna duqa Muqdisho, Yuusuf Xuseen Jimcaale.
Guddoomiyaha Gobolka Banaadir ahna Duqa Muqdisho Yuusuf Xuseen Jimcaale Madaale, ayaa wax laga weydiiyay Canshuurta iyo sida ay si hufan ugu soo gaari karto Dowladda Hoose, iyadoo aysan jirin wax musuq maasuq ah, Yuusuf Madaale ayaa sheegay in dhowr jeer ay gacanta ku dhigeen Mas’uuliyiin lagu helay wax isdaba marin, isagoo ballan qaaday inay xaqiijin doonaan. la xisaabtanka adeegyada wanaagsan.
