Sarkaal ka tirsan Ciidanka Booliska Jubbaland ayaa la xiray kadib markii uu si toos ah u dilay wariye caan ah oo lagu magacaabay Abshir Khaliif Shide Omar, sida ay xaqiijiyeen mas’uuliyiinta iyo warbaahinta Jubaland.
Dilka ayaa ka dhacay fiidnimadii Isniinta, magaalada Kismaayo, ka dib markii muran gaaban uu dhexmaray wariyaha iyo sarkaalkan.
Sababta rasmiga ah ee uu sarkaalka u toogtay wariyaha weli lama oga, baaritaan ayaa socda si loo caddeeyo duruufaha dhacdada.
Afhayeenka Booliska Jubbaland, Kapten Shukri Faarax Ducaale, ayaa sheegay in sarkaalkan la xiray oo maxkamad la horkeenayo, si caddaalad loo helo.
Marxuum Abshir wuxuu ka soo shaqeeyay Jubbaland TV, Radio Wamo, wuxuuna cameraman ka ahaa shirkadda Hornconnect qeybteedi Kismaayo.
Wasaaradda Warfaafinta, Dhaqanka iyo Dalxiiska Jubbaland ayaa tacsi tiiraanyo leh u dirtay qoyska, ehelka iyo wariyeyaasha kale.
Waxaa si gaar ah loogu mahadceliyay Ciidanka Booliska Jubbaland falcelinta degdegga ah iyo qabashada eedeysaneha.
Geeridan Abshir ayaa u muuqata inay tahay dilkii ugu horreeyay ee wariye sanadkan Soomaaliya, taasoo muujinaysa welwelka ku saabsan badbaadada wariyeyaasha iyo xoriyadda saxaafadda.
Ururka Suxufiyiinta Soomaaliyeed (SJS) ayaa si weyn uga xumaaday dilka wariye Abshir Khaliif Shidane oo magaalada Kismaayo ee dowlad goboleedka Jubaland maqribnimadii Isniinta 2-dii March 2026 uu ku dilay sarkaal ka tirsan ciidamada booliska dowlad goboleedka Jubbaland.
Abaare 7:30 PM ee xiliga geeska Afrika ayaa Abshir waxa uu ka soo baxay gurigiisa kuna sii jeeday bartamaha magaalada,waxana askari ka tirsan ciidamada Booliska Jubbaland uu damcay in uu joojiyo,waxana uu isla markiiba toogtay,sida uu sheegay sarkaal ka tirsan booliska deegaanka oo la hadlay SJS iyo dad goob joogayaal ah.
Afhayeenka Ciidanka Booliska Jubbaland, Kabtan Shukri Faarax Ducaale, ayaa sidoo kale xaqiijisay dilka weriyaha uu u geystay askari ka tirsan ciidamada Booliska, xilli ay saxaafadda la hadlaysay, sida ay ku warrantay warbaahinta gudaha.
Cadeymo sawiro ah oo booliska maxalli ah oo lala wadaagay SJS ayaa muujinaya in Abshir halmar laga toogtay dhanka bidix ee xabadka, iyadoo xabadu ay ka gudubtay sambabada ayna dhaawacday wadnaha ka hor inta aysan ka bixin dhabarka. Booliska magaalada Kismaayo ayaa ku dhawaaqay in gacanta lagu soo dhigay eedeysanaha oo markii uu dilka geystay goobta ka baxsaday, haatana uu xabsiga ku jiro.
Afhayeenka Ciidanka Booliska, Kabtan Shukri Faarax Ducaale, ayaa sheegtay in muran dhex maray Abshir iyo eedeysanaha, ka hor inta aan la toogan.
Abshir oo 25-jir ahaa ayaa ahaa Cameriyaaste, wuxuuna dhawaan ka soo shaqeeyay Idaacadda Waamo ee fadhigeedu yahay magaalada Kismaayo. Horay waxa uu uga soo shaqeeyay TV-ga Jubaland State.
SJS ma diiwaangelin wax hanjabaad ah oo hore oo la xidhiidha shaqada Abshir.
Sababta toogashada ma cadda, sida ay booliisku sheegeen. Si kastaba ha ahaatee, SJS waxay ku baaqaysaa in si hufan oo hufan loo baaro xaaladihii keenay geerida Abshir.
Waa dilkii ugu horeeyay ee wariye loogu geysto gudaha Soomaaliya sanadka 2026-ka, iyadoo dalka uu weli walaac xoogan ka jiro isla xisaabtan la’aanta dambiyada ka dhanka ah suxufiyiinta. Sanadkii hore oo kaliya, laba wariye ayaa lagu dilay mid ka mid ah waxaa lala beegsaday qarax Al-Shabaab, mid kalena waxaa toogtay nin hubeysan oo kaligiis ahaa magaalada Muqdisho.
Dilka wariye Abshir Khaliif Shidane ee ka dhacay magaalada Kismaayo waa weerar naxdin leh oo sii kordhinaya welwelka aan ka qabno badqabka suxufiyiinta ka howlgala Soomaaliya, gaar ahaan xilli weerarrada ka dhanka ah shaqaalaha warbaahinta ay inta badan yihiin kuwo aan baaritaanno lagu sameyn,” ayuu yiri xoghayaha guud ee SJS, Cabdalle Muumin. Xalay waxaan la hadlay asxaabtii SJS ee ay wada shaqeynayeen Abshir maalmo ka hor, waxayna ila wadaageen xirfadiisa shaqo, howlkarnimadiisa, iyo jaceylka qotoda dheer ee uu u qabay saxaafada taasoo iga sii murugooneysa geeridiisa naxdinta leh”.
“Maamulka Jubbaland waxaan ugu baaqeynaa in ay sameeyaan baaritaan hufan oo hufan, cadaalada la horkeeno qoyska Abshir, mas’uuliyiintu waa in ay xaqiijiyaan in saxafiyiinta ay shaqadooda u gudan karaan iyaga oo aan ka baqeynin dhibaato iyo caga-jugleyn haddii ay tahay Muqdisho iyo haddii ay ahaan lahayd dowlad goboleedyada”ayuu hadalkiisa sii raaciyay Mudane Muumin.
