Taliska Mareykanka ee Afrika (AFRICOM) ayaa difaacay kordhinta weerarrada cirka ee Soomaaliya, isagoo ku tilmaamay taageero muhiim ah oo ka awoodda ISIS isla markaana ay xajiyaan dhul istiraatiiji ah oo laga saaray Daacish sanadkii hore.
Intii lagu guda jiray shir jaraa’id oo fogaan-arag ah, Taliyaha AFRICOM, General Dagvin Anderson, ayaa sheegay in weerarradan ay ahaayeen kuwo la isugu dubariday ciidamada Soomaaliyeed isla markaana looga gol lahaa in la muujiyo awoodaha ay ciidamada maxalliga leeyihiin iyagoo ka caawinaya sirdoonka, kormeerka, iyo bartilmaameedyada.
General Anderson ayaa tusaale ahaan u soo qaatay howlgallada ka dhacay Buuraleyda Calmiskaad ee Puntland si uu u muujiyo saameynta taageerada cirka ee Mareykanka. Sida uu sheegay, ciidamada Soomaaliyeed ee la shaqeeya Mareykanka ayaa weerar ku qaaday kooxda ISIS oo ka howlgalaysay dhulka buuraha adag, taasoo si weyn u yareysay booska ay kooxdaasi ku fadhiday.
“Weerarradani waxay u suurta geliyeen inay sii wadaan hawlgallada, yareeyaan dhulka ay ISIS haystaan,” ayuu yiri Anderson, isagoo soo xiganayay jawaab celinta ka timid la-hawlgalayaasha Soomaaliyeed.
Wuxuu intaa ku daray in cadaadiska joogtada ah uu qasbay hoggaanka ISIS ay dhuuntaan isla markaana uu xaddiday awoodda kooxda inay si furan u abaabusho weeraro.
Inkastoo howlgallada cirka ay soo jiiteen indhaha caalamaka, mas’uuliyiinta AFRICOM waxay adkeeyeen in ay yihiin kaliya hal dhinac oo ka mid ah iskaashiga ballaaran ee amniga Soomaaliya.
General Anderson ayaa adkeeyay in taageerada Mareykanka ay kaalin ka tahay oo aanay bedelin ciidamada Soomaaliyeed.
“Ciidamada Soomaaliyeed waxay fuliyaan howlgallada dhulka, halka Mareykanka uu bixiyo sirdoonka, tababarka, taageerada saadka, iyo weerarrada cirka ee bartilmaameedsan marka loo baahdo,” ayuu yiri.
Mas’uuliyiintu waxay ku doodaan in qaabkan iskaashiga uu u suurtagelinayo ciidamada Soomaaliyeed inay sii wadaan horumarka ka dhanka ah dagaalyahannada isla markaana dhisaan awood ay ku gaaraan xasilooni waarta.
Maraykanka ayaa in ka badan 100 duqayn ah sanadkii hore ka geystay Soomaaliya, kuwaas oo intooda badan uu ka geystay buuraha Calmiskaad, halkaas oo ay ciidamada Puntland muddo ka badan sanad kula dagaalamaayan ururka Daacish.
Isla sanadkan cusub, Maraykanka ayaa bishii koowaad ee sanadkan ku dhawaad 25 duqayn ka geystay Soomaaliya.
