Taliyaha guud ee ciidamada Uganda, Jeneraal Muhoozi Kainerugaba, ayaa soo saaray hadallo si weyn u soo jiitay indhaha beesha caalamka, kaddib markii uu si toos ah ugu dalbaday dowladda Turkiga lacag dhan 1 bilyan oo doolar, isagoo ku hanjabay cawaaqib diblomaasiyadeed haddii dalabkaas aan la fulin.
Hadallo isdaba joog ah oo uu si fagaare ah u jeediyay, ayuu Jeneraal Muhoozi ku eedeeyay Turkiga inuu ka faa’iideystay xaaladda amni ee Soomaaliya, isaga oo aan si ku filan uga abaal marin Uganda oo muddo dheer ku jirtay dadaallada amni ee dalka.
Wuxuu tilmaamay in shirkado iyo mashaariic ay taageerto dowladda Turkiga ay heleen qandaraasyo waaweyn oo dhinaca kaabeyaasha dhaqaalaha ah, iyo marin istiraatiiji ah oo gudaha Soomaaliya ah, oo ay ka mid yihiin howlaha la xiriira dekedda iyo garoonka diyaaradaha ee Muqdisho.
Arrimahaas ayuu sheegay inay suuragaleen sababo la xiriira dadaalladii amni ee joogtada ahaa ee ay bixiyeen ciidamada Uganda.
Ciidamada Uganda ayaa ku lug lahaa howlgalada Midowga Afrika ee Soomaaliya ku dhawaad labaatan sano, iyagoo door muhiim ah ka qaatay la dagaallanka kooxda Al-Shabaab iyo taageeridda hay’adaha dowladda Soomaaliya.
Jeneraal Muhoozi ayaa ku dooday in doorka Uganda uu u baahan yahay in lagu abaal mariyo waxa uu ugu yeeray “faa’iido amni”, isaga oo si cad u dalbaday lacag dhan 1 bilyan oo doolar si loogu beddelo kharashaadka iyo naf-hurnimada ay ciidamada Uganda galeen sannadihii la soo dhaafay ama ay ciidankiisu kala bixi doono Soomaaliya.
“Ciidankeenu waan kala baxeeynaa Soomaaliya bal aan aragno sida Turkida ay Soomaaliya ka badbaadiyaan Al shabaab.” Ayuu ku yiri qoraal uu soo dhigay bartiisa X.
Sidoo kale, wuxuu sii xoojiyay xiisadda isaga oo sheegay in Uganda ay ka fiirsan karto xiritaanka safaaradda Turkiga ee Kampala haddii aan dalabkaas la aqbalin, tallaabadaas oo noqon karta mid si weyn u dhaawacda xiriirka diblomaasiyadeed ee labada dal.
Ilaa hadda, dowladda Turkiga iyo masuuliyiinta Soomaaliya kama aysan bixin wax jawaab rasmi ah oo ku aaddan hadalladan.
