Tayada dhismaha waddooyinka iyo buundooyinka gobolka Hiiraan ayaa dhalisay su’aalo ku saabsan sida loo qorsheeyo mashaariicda kaabayaasha dhaqaalaha, kaddib markii la arkay biyo dul maraya wadooyinka qaar, isla markaana ay qaadeen qaybo ka mid ah carrada iyo jaayga saldhigga u ahaa dhismaha waddada.
Dadka arrintan ka hadlay ayaa sheegay in waddooyinka la dhisayo ay u baahan yihiin qorsheyn wanaagsan iyo tayo waarta, si ay ugu adkeystaan biyaha roobabka iyo fatahaadaha. Waxay tilmaameen in buundooyinka iyo marin-biyoodka loo sameeyo qaab ku habboon xaddiga biyaha laga filayo inay maraan goobahaas.
Arrintan ayaa sidoo kale dhalisay su’aalo ku saabsan kormeerka mashaariicda waddooyinka iyo masuuliyadda hay’adaha ay khuseyso, iyadoo dad badan ay aaminsan yihiin in isla xisaabtan la’aanta maamulka gobolka Hiiraan ay qayb ka tahay sababaha keena walaaca laga muujinayo tayada mashaariicda.
Marka laga hadlayo waddooyinka muddo dheer jiray, waxaa tusaale loo soo qaadanayaa waddada isku xirta Buulo Burte iyo Feerfeer, oo la sheegay in la dhisay sannadihii 1930-meeyadii. Waddadan ayaa loo xusay muhiimadda ay leedahay in buundooyinka iyo marin-biyoodka lagu saleeyo daraasado lagu ogaanayo meelaha ay biyuhu maraan iyo awoodda ay u baahan yihiin dhismayaasha halkaas laga sameeyo.
Dadka arrintan ka hadlay ayaa isweydiinaya sababta waddooyinkii hore loogu qorsheyn jiray marinno ay biyuhu maraan, halka maanta ay jiraan waddooyin ay biyuhu dusha ka maraan, taas oo keeni karta in ay dhaawacmaan qaybaha waddada ee carrada iyo jaayga laga sameeyey.
Waxay ku baaqeen in ka hor inta aan waddo la dhisin la sameeyo daraasado ku saabsan roobabka, fatahaadaha, xaaladda dhulka iyo xaddiga biyaha laga filayo inay maraan goobta. Waxay sidoo kale sheegeen in buundo kasta loo qaabeeyo si ay ula jaanqaaddo baaxadda biyaha iyo xoogga qulqulka.
Haddii aan arrimahaas si wanaagsan loo tixgelin, waddooyinka ayaa halis ugu jira burbur soo noqnoqda, taas oo keeni karta kharash dayactir oo dheeraad ah, go’doon ku yimaadda deegaannada iyo caqabado saameeya isu-socodka dadka iyo gaadiidka.
Dadka walaaca ka muujinaya arrintan ayaa maamulka gobolka Hiiraan iyo hay’adaha kale ee ay khuseyso ugu baaqay inay dib u eegaan habka loo kormeero mashaariicda waddooyinka, lana hubiyo tayada dhismaha iyo masuuliyadda shirkadaha fulinaya shaqooyinka.
