Wasiirka Gaashaandhigga Soomaaliya Cabdulqaadir Maxamed Nuur ayaa wacad ku maray in Soomaaliya aysan cabsi gelin doonin hanjabaadaha dhawaan kasoo yeeray Itoobiya, isagoo carabka ku adkeeyay in dalka uu diyaar u yahay in uu ka jawaabo fal kasta oo gardaro ah oo ka dhan ah ciidankeeda iyo shacabkeeda.
Hadal uu ka jeediyay Muqdisho ayuu Wasiir Nuur ku yiri “Waxaan rabnaa in Soomaaliya iyo Itoobiya ay ku wada noolaadaan nabad iyo derisnimo, laakiin haddii maamulka daciifka ah ee Abiy iyo Jula ay ilaalin waayaan nabadda, kuwa colaadda hurinaya waxay arki doonaan cidda cawaaqib xun kala kulmi doonta”.
Hadalka wasiirka ayaa jawaab toos ah u ahaa hadal ka soo yeedhay taliyaha ciidamada qaranka Itoobiya Field Marshal Birhanu Jula. Jula ayaa dhawaan eedeyn u jeediyay Madaxweynaha Soomaaliya Xasan Sheekh Maxamuud, isagoo sheegay in uusan awood u laheyn inuu naga horyimaado oo uu sugo ammaanka caasimadda Muqdisho.
Jula ayaa sidoo kale beeniyay eedeymaha dowladda Soomaaliya ay u jeedisay ee ah in Itoobiya ay soo galisay hub aan la fasaxin Soomaaliya.
Xiisada u dhaxaysa Soomaaliya iyo Itoobiya ayaa cirka isku sii shareertay, waxaana sabab u ah heshiiska muranka badan dhaliyay ee Itoobiya ay la gashay Somaliland, taasoo Itoobiya u ogolaatay inay galaan Badda Cas—tallaabadan ay Soomaaliya u aragto mid meel ka dhac ku ah qaranimadeeda.
Somaliland oo ah maamul madax-banaanideeda kaga dhawaaqay waqooyi-galbeed ee Soomaaliya, ayaa tan iyo sannadkii 1991-kii raadinaysay madax-bannaani, balse weli beesha caalamku ma aqoonsan. Midowga Afrika waxa uu sii wadaa in uu dhawro siyaasadda ixtiraamka xuduudaha uu gumaysigu jeexay, taas oo ka dhigaysa sheegashada madax-banaanida Somaliland mid sharci darro ah.
