20-ka degmo ee gobolka Banaadir ayaa waxaa ka socda qabanqaabo doorasho oo hal qof iyo cod ah sanadka 2026-ka, sida uu sheegay guddoomiye ku xigeenka amniga iyo siyaasadda Maxamed Axmed Diiriye Yabooh.
Yabooh oo ka hadlayay Muqdisho ayaa xaqiijiyay in maamulka uu diyaar u yahay, isagoo xusay in diyaar garowga ay ka mid yihiin sidii loo ogaan lahaa goobaha cod bixinta iyo adkeynta ammaanka caasimadda.
“Maamulka Gobolka Banaadir waxa uu mar walba ahaa mid si firfircoon uga qayb qaata shirarka Madasha Wadatashiga Qaran,” ayuu yiri Yabooh oo ku nuux-nuuxsaday sida ay uga go’an tahay horumarinta hannaanka doorashada Soomaaliya.
Hadalkan ayaa daba socday kulan Arbacadii shalay dhexmaray duqa magaalada Muqdisho Yuusuf Xuseen Jimcaale Madaale iyo guddiga KMG ah ee baarlamaanka Soomaaliya u qaabilsan shuruucda doorashooyinka. Intii ay socotay doodaha, guddigu waxay ballan-qaadeen inay talooyinka maamulka G/Banaadir ku daraan sharciga u dambeeya ee doorashada, kaasoo hagi doona doorashooyinka soo socda iyo in si rasmi ah loo soo dhiso guddiga doorashooyinka qaranka.
Madaxweyne Xasan Sheekh Maxamuud ayaa mar kale sheegay in dowladda federaalka ay ka go’an tahay hirgelinta doorasho qof iyo cod ah marka la gaaro sanadka 2026-ka, isagoo ku tilmaamay tallaabo laf dhabar u ah horumarka dimoqraadiyadda Soomaaliya.
