Somaliland ayaa shaacisay inay diyaar u tahay inay Mareykanka la gasho heshiis la xidhiidha khayraadkeeda macdanta, isla markaana ay u oggolaato in Washington saldhigyo ciidan ku yeelato xeebaha Gacanka Cadmeed, sida uu wakaaladda wararka ee AFP u sheegay Wasiirka Madaxtooyada Somaliland, Khadar Xuseen Cabdi.
Wasiirka ayaa caddeeyay in Somaliland si dhab ah u danaynayso heshiis istiraatiiji ah oo ay la gaadho Mareykanka. “Waxaan diyaar u nahay inaan siino Mareykanka helitaan gaar ah oo ku saabsan macdanahayaga. Sidoo kale, waxaan u furan nahay inaan siino saldhigyo ciidan,” ayuu yidhi wasiirku.
Wuxuu intaas ku daray inuu rajo weyn ka qabo in wada-hadalladaasi miro-dhal noqdaan. “Waxaan aaminsanahay inaan wax ku heshiin doono Mareykanka,” ayuu u sheegay AFP.
Sidoo kale, wasiirku meesha kama saarin suurtagalnimada in Israa’iil ay ka hesho saldhig ciidan Somaliland, gaar ahaan aagga istiraatiijiga ah ee Berbera. Madaxweynaha Somaliland ayaa dhowaan shaaca ka qaaday inuu ka shaqaynayo heshiisyo la xidhiidha macdanta iyo tiknoolajiyadda oo uu la geli doono Israa’iil.
Warbixinta AFP ayaa sheegtay in mas’uuliyiinta Somaliland ay ku doodayaan in dhulkoodu hodan ku yahay macdano qiimo badan leh sida lithium iyo coltan, inkasta oo aan weli la helin xaqiijin madax-bannaan oo arrintaas lagu sameeyay.
Hadalkan ayaa imanaya xilli Somaliland ay sii laba-jibbaarayso dadaalladeeda ku aaddan helitaanka aqoonsi caalami ah, kadib markii Israa’iil ay bishii December muujisay taageerada ay u hayso madaxbannaanida Somaliland iyada oo goobta juqraafiyeed ee Somaliland oo ku taallo ay sii xoojinayso muhiimaddeeda dhinaca amniga iyo ganacsiga caalamiga ah.
Dhanka kale, dowladda federaalka Soomaaliya ayaa si adag uga hortimid suurtagalnimada heshiis kasta oo ay Somaliland la gasho dowlad shisheeye, iyadoo sheegtay in Somaliland ay ka mid tahay dhulka Jamhuuriyadda Federaalka Soomaaliya.
