Madaxweynaha Somaliland, Cabdiraxmaan Maxamed Cabdillaahi Cirro, ayaa sameeyey isku shaandhayn ballaadhan oo uu ku sameeyay Golaha Wasiirrada, taas oo isugu jirta xil-ka-qaadis, magacaabis iyo isku beddel lagu sameeyey xubno muhiim ah oo ka tirsan xukuumadda.
Garyaqaan Barkhad Jaamac Xirsi Batoon oo ahaa xildhibaankii ugu codka badnaa Golaha Wakiillada doorashadii 2021, ayaa loo magacaabay Wasiirka Wasaaradda Warfaafinta, Dhaqanka iyo Wacyigelinta kadib markii uu is casilay wasiirkii hore Axmed Yaasiin Sheekh Cali Ayaanle. Sidoo kale, Aadan Geeddi Qayaad ayaa loo magacaabay Wasiirka Beeraha, Maxamed Cabdimaalik Wasiirka Biyaha, sidoo kale Dr. Cabdisalaan Xuseen Cawaale ayaa loo magacaabay Wasiirka Isgaadhsiinta.
Masuuliyiinta la isku beddelay waxaa ka mid ah Mukhtaar Xaaji Muxumad Faarax oo laga beddelay Wasiir Ku-xigeenka Wasaaradda Horumarinta Beeraha, loona magacaabay Wasiir Ku-xigeenka Wasaaradda Horumarinta Biyaha. Sidoo kale, Eng Maxamed Cilmi Xuseen (Huuno) ayaa laga wareejiyey xil uu hore uga hayey wasaarad kale loona magacaabay Wasiir Ku-xigeenka Wasaaradda Shaqada, Arrimaha Bulshada iyo Qoyska.
Dhankiisa, Maxamed Muuse Xaaji Cabdi (Galaaydh) ayaa laga beddelay boos uu hore uga hayey xukuumadda, loona magacaabay Wasiir Ku-xigeenka Wasaaradda Warfaafinta, Dhaqanka iyo Wacyigelinta. Halka Maxamed Yuusuf Ibraahim Faacuul laga wareejiyey Wasiir Ku-xigeenka Wasaaradda Waxbarashada loona magacaabay Wasiir Ku-xigeenka Wasaaradda Macdanta iyo Tamarta.
Sidoo kale, Dr. Maxamed Aw Daahir Ibraahin ayaa laga beddelay Wasiir Ku-xigeenka Wasaaradda Deegaanka iyo Isbeddelka Cimilada loona wareejiyey Wasiir Ku-xigeenka Wasaaradda Horumarinta Caafimaadka, halka Marwo Samsam Maxamed Saalax Yacniile iyaduna laga wareejiyey isla wasaaraddaas Deegaanka loona magacaabay Wasiir Ku-xigeenka Wasaaradda Horumarinta Caafimaadka.
Dhanka kale, Eng Maaliki Cabdi Xasan Xirsi ayaa laga beddelay Wasiir Ku-xigeenka Wasaaradda Isgaadhsiinta iyo Tiknoolajiyadda loona wareejiyey Wasiir Ku-xigeenka Wasaaradda Horumarinta Beeraha, taas oo qayb ka ah dib-u-habayn lagu sameeyey wasaaradaha wax-soo-saarka.
Ugu dambayn, Khadar Xaaji Yuusuf Cabdillaahi ayaa loo magacaabay Guddoomiyaha Hay’adda Shaqaalaha, halka Dr. Maxamed Cismaan Fadal loo magacaabay La-taliyaha Sare ee Madaxweynaha ee Arrimaha Dibedda.
