Soomaaliya ayaa heshay dhiirigelin ciidan oo muhiim ah oo ku aaddan dagaalka ka dhanka ah argagixisada, iyadoo diyaarado helicopter ah oo nooca Bell 412EPX ah laga keenay Talyaaniga. Wareejintan oo dhacday 28-kii Agoosto ayaa noqonaysa tii ugu badnayd ee qalab ciidan lagu wareejiyo Soomaaliya tan iyo markii Qaramada Midoobay laga qaaday cunaqabataynta hubka bishii December 2023.
Diyaaradahan oo lagu qiimeeyay 16 Milyan oo Doollarka Mareykanka ah, ayaa lagu wadaa in ay kaalin mug leh ka qaataan howlgallada milateri ee ka dhanka ah kooxda xagjirka ah ee Al-Shabaab. Shixnaddan ayaa ah tiir-dhexaad u ah dadaallada ay Soomaaliya ku doonayso inay ku xoojiso awooddeeda difaaca, gaar ahaan iyadoo ay weli sii socoto ka-hortagga kacdoonnada iyo xasilloonida gobolka.
Wareysi gaar ah oo uu siiyay Warbaahinta Dowladda, Safiirka Dowladda Talyaaniga u fadhiya Soomaaliya, Mario Dacco, ayaa ku nuux-nuux saday muhiimadda gaarsiintaasi ay u leedahay gulufka dagaal ee Soomaaliya. Wuxuu carabka ku dhuftay in diyaaradaha helicopter-yada ay taageero muhiim ah ka geysan doonaan howlgallada ka dhanka ah kooxaha argagixisada ah, ayna qeyb ka yihiin ballanqaadka ballaaran ee Talyaanigu uu ku horumarinayo kaabayaasha ammaanka ee Soomaaliya.
“Diyaaradaha helikobter-ka kaliya ma xoojin doonaan awoodda hawl-galka ee milateriga Soomaaliya balse waxay sidoo kale gacan ka geysan doonaan dadaallada ballaaran ee amniga ee lagu doonayo in lagu xasiliyo dalka,” ayuu yiri danjire Dacco.
Helikopterrada Bell 412EPX waxaa lagu yaqaanaa wax-qabadkooda iyo waxtarkooda xaaladaha dagaalka. Waxaa la filayaa in ay si weyn u xoojiyaan dhaq-dhaqaaqa Ciidamada Qalabka Sida ee Soomaaliya iyo waqtiga jawaab celinta, taasi oo u sahlaysa in ay si wanagsan uga hortagaan maleeshiyada Al-Shabaab oo muddo dheer argagax ku hayay qeybo ka mid ah dalka.
Soomaaliya ayaa tan iyo markii laga qaaday cunaqabateynta hubka, waxa ay sare u qaadeysay dadaallada ay ku bixineyso ciidamada, taasi oo xanibaad ku soo rogtay agabka ciidan ee dalka soo gala muddo ka badan sodon sano. Go’aanka Qaramada Midoobay ee xayiraadda looga qaaday ayaa loo arkay tallaabo muhiim ah oo lagu suurtagelinayo Soomaaliya inay xoojiso difaaceeda ka dhanka ah argagixisada iyo nabad-diidka.
