Maamulka Puntland ayaa lagu soo waramayaa inay joojiyeen mushaaraadkii iyo raashiinkii ay siin jireen ciidamada ku sugan gobolada Sool iyo Cayn, kadib markii deegaanadaasi ay la safteen maamul goboleedka cusub ee Waqooyi Bari ee dowladda Federaalka Soomaaliya, taasoo sii xoogeysatay xiisada ka dhex aloosan gobolada dalka Soomaaliya oo siyaasad ahaan aad u kala qeybsan.
Ilo xog ogaal ah ayaa sheegay in go’aankan uu jawaab u yahay niyad jabka sii kordhaya ee ka jira magaalada Garoowe kadib markii qaar ka mid ah saraakiisha iyo ciidamada Sool iyo Cayn ay ku biireen maamulka la dhisayo, isla markaana ay diideen inay amar ka qaataan taliska guud ee Puntland.
Dadka ay dhibaatadu soo gaartay waxaa ka mid ah ciidamo daacad u ahaa madaxweyne ku xigeenkii hore ee Puntland Axmed Karaash oo ah shaqsi muhiim u ah siyaasadda oo lagu tiriyo in uu qeyb weyn ka qaatay dhismaha maamulka Waqooyi Bari.
Ciidamadan oo aan wax mushaar ah qaadan ayaa sida aan xogta ku heleyno waxa ay dhawaan kulan la qaateen Madaxweyne ku xigeenka Puntland Ilyaas Lugatoor oo kasoo jeeda gobolka Sool, iyagoo ka codsaday in dib loogu soo celiyo mushaarkooda iyo raashiinkooda. Waxa ay sheegeen in mushaar la’aan iyo sahay la’aan ay ku maqan yihiin muddo saddex bilood ah, waxa ayna ka digeen in ay qaadaan tillaabo aan la cayimin oo ay ka mid tahay in ay xiraan waddooyinka muhiimka ah, haddii dalabkooda laga jawaabi waayo.
