Wasaaradda Gaashaandhigga Soomaaliya ayaa faahfaahin hordhac ah ka bixisay dagaalka culus ee ka socda magaalada Baydhabo, xarunta gobolka Baay, kaas oo u dhexeeya ciidamada dowladda Soomaaliya iyo ciidamo taabacsan madaxweynihii hore ee Koonfur Galbeed, Cabdicasiis Xasan Maxamed Laftagareen.
Wasaaradda ayaa sheegtay in ciidamada dowladda ay iska caabiyeen weerarka lagu qaaday magaalada, isla markaana ay jab xooggan gaarsiiyeen ciidamadii weerarka soo qaaday.
War kasoo baxay Wasaaradda Gaashaandhigga ayaa lagu sheegay in ciidamada dowladda ay dagaalka kula galeen maleeshiyaad ay ku tilmaantay kuwo ka tirsan Al-Shabaab iyo ciidamo taabacsan Laftagareen oo isku milmay.
Wasaaradda ayaa sidoo kale sheegtay inay soo bandhigtay maydadka xubno lagu dilay dagaalka, iyadoo tilmaamtay in ciidamada dowladda ay si adag uga hortageen weerarka.
Sida lagu sheegay warbixinta Wasaaradda, ciidamada dowladda iyo kuwa Birmadka ee maamulka Koonfur Galbeed ayaa weli gacanta ku haya magaalada Baydhabo, waxaana la sheegay in weerarkii lagu soo qaaday magaalada uu fashilmay.
Wasiirka Gaashaandhigga Soomaaliya, Axmed Macallin Fiqi, ayaa isaguna ka hadlay dagaalka, isagoo bogaadiyay ciidamada dowladda iyo kuwa Birmadka ee ka qayb qaatay dagaalka.
“Mataanihii Argagixisada ee saakay soo weeraray Baydhabo jab xooggan ayaa dhabarka loo saaray,” ayuu yiri Wasiir Axmed Macallin Fiqi, isagoo qoraal kooban ku baahiyay baraha bulshada.
Hadalka Wasiirka ayaa ku soo beegmaya xilli magaalada Baydhabo ay weli ka socoto rasaas iyo iska horimaadyo u dhexeeya dhinacyada dagaallamaya.
Inkasta oo Wasaaradda Gaashaandhigga ay sheegtay in ciidamada dowladda ay si buuxda gacanta ugu hayaan Baydhabo, haddana wararka kale ee kasoo baxaya magaalada ayaa tilmaamaya in xaaladda amni aysan weli deggenayn.
Wararkii ugu dambeeyay ayaa sheegaya in ciidamada taabacsan Laftagareen ay weli dagaallo ka wadaan qeybo kamid ah magaalada, gaar ahaan agagaarka Masaajida Carabta iyo Jaamaca, oo labaduba ku yaalla nawaaxiga Afar-irdoodka Baydhabo.
Dagaalka ayaa sidaas darteed weli saameynaya qeybo kamid ah magaalada, iyadoo dadka shacabka ah ay wajahayaan xaalad adag oo ka dhalatay rasaasta iyo hubka culus ee la adeegsanayo.
Labada dhinac ayaa horey u soo saaray warar kala duwan oo ku saabsan cidda gacanta ku haysa magaalada iyo halka uu dagaalku marayo. Dhinaca dowladda ayaa sheegaya in weerarka la jebiyay, halka dhinaca Laftagareen uu isaguna sheeganayo inuu dagaalka guulo ka gaaray oo ciidamadiisu ay gudaha magaalada ku sugan yihiin.
Xogta ku saabsan khasaaraha dhabta ah ee dagaalka ayaa weli ah mid aan si madax-bannaan loo xaqiijin. Wasaaradda Gaashaandhigga ayaa sheegtay in ay jiraan xubno lagu dilay dagaalka, balse tirada guud ee dhimashada iyo dhaawaca ciidamada iyo shacabka weli lama shaacin.
Dagaalka Baydhabo ayaa kusoo beegmaya xilli magaalada ay muddooyinkii dambe ka taagnayd xiisad siyaasadeed iyo mid amni oo u dhexeysa dowladda federaalka iyo garabka Laftagareen.
Iskahorimaadyo hore oo magaalada iyo nawaaxigeeda ka dhacay ayaa sababay dhimasho, dhaawac, barakac iyo burbur hantiyeed, iyadoo shacabka Baydhabo ay marar badan wajahaan xaalado amni oo adag.
Baydhabo ayaa sidoo kale ah xarun muhiim u ah siyaasadda iyo maamulka Koonfur Galbeed, taas oo dagaal kasta oo ka dhaca magaalada ka dhigaysa mid saameyn ku yeelan kara xaaladda siyaasadeed iyo amni ee guud ahaan gobolka.
Waqtigan xaadirka ah, xaaladda magaalada ayaa weli kacsan, waxaana socda isku dhacyo ka dhacaya qeybo kamid ah Baydhabo.
Wasaaradda Gaashaandhigga waxay sheegtay in ciidamada dowladda ay gacanta ku hayaan magaalada, halka wararka goobta laga helayo ay tilmaamayaan in dagaallo ay weli ka socdaan agagaarka Afar-irdoodka.
Faahfaahin dheeraad ah oo ku saabsan khasaaraha dagaalka, xaaladda shacabka iyo cidda gacanta ku haysa goobaha muhiimka ah ee magaalada ayaa la filayaa inay soo baxdo.
