Maamulka Dekedda Muqdisho ayaa sheegay in dhammaan 18-kii shaqaale ee saarnaa markabka MV JACUAR la badbaadiyey, kadib markii markabka uu xaalad degdeg ah galay oo uu ku caariyay badda meel qiyaastii 12 mayl-badeed waqooyi ka xigta magaalada Muqdisho.
Sida lagu sheegay bayaanka horudhaca ah ee Maamulka Dekedda Muqdisho iyo Wasaaradda Dekedaha iyo Gaadiidka Badda Soomaaliya, dhacdadu waxay bilaabatay xilli markabka uu ku sugnaa aagga barroosinka ee Dekedda Muqdisho. Markabka ayaa diray farriin xaalad-degdeg ah, isagoo sheegay in biyo ay gudaha u soo galayaan.
Maamulka Dekedda Muqdisho ayaa markabka faray inuu barroosinka qaado oo uu ka fogaado aagga dekedda, kadib markii la qiimeeyay khatarta ka dhalan karta xaaladda markabka. Waxaa sidoo kale lagu amray inuu u dhaqaaqo dhanka waqooyi, si loo yareeyo khatarta ku iman karta markabka iyo maraakiibta kale ee ku sugan meelaha u dhow Dekedda Muqdisho.
Markabka ayaa markii dambe ku caariyay badda meel qiyaastii 12 mayl-badeed waqooyi ka xigta Muqdisho, halkaas oo ay ciidamada iyo hay’adaha ay khusayso ka bilaabeen howlaha badbaadinta iyo sugidda amniga.
MV JACUAR ayaa ka soo baxay Dekedda Beira ee dalka Mozambique, waxaana uu ku sii jeeday Dekedda Adabiya ee dalka Masar. Markabka ayaa siday xamuul ka kooban maar loo yaqaan Copper Cathodes, waxaana la sheegay in markabka uu leeyahay shirkad laga leeyahay dalka Suuriya.
Markabka waxaa saarnaa 18 shaqaale ah oo u kala dhashay Hindiya, Suuriya iyo Masar. Maamulka Dekedda Muqdisho ayaa xaqiijiyay in dhammaan shaqaalihii saarnaa markabka ay badbaadeen, iyadoo aan la soo sheegin dhimasho ama dhaawac ka dhashay dhacdada.
Shaqaalaha ayaa si nabad ah looga soo daadgureeyay markabka, waxaana doonyaha Booliska Badda Soomaaliya lagu soo gaarsiiyay magaalada Muqdisho. Markii ay soo gaareen magaalada, Maamulka Dekedda ayaa sheegay inay gacanta ku hayaan shaqaalaha, isla markaana loo diyaariyey hoy, cunto iyo adeegyada kale ee muhiimka ah.
Maamulka Dekedda ayaa sheegay in qorshe loo diyaarinayo sidii shaqaalaha loogu celin lahaa dalalkooda, iyadoo la raacayo habraacyada ku habboon ee la xiriira xaaladda markabka iyo shaqaalihii saarnaa.
Dhanka kale, Booliska Badda Soomaaliya ayaa fuulay markabka MV JACUAR, iyagoo la wareegay sugidda amniga markabka iyo xamuulka saaran. Tallaabadan ayaa looga gol leeyahay in la ilaaliyo markabka, xamuulka iyo goobta uu ku caariyay, inta laga sameynayo qiimeyn dheeraad ah oo ku saabsan xaaladdiisa.
Maamulka Dekedda Muqdisho ayaa sidoo kale sheegay in la xaddiday gelitaanka markabka, iyadoo aan loo oggolaanayn cid aan loo idman inay fuusho. Arrintan ayaa qeyb ka ah tallaabooyinka amni ee lagu ilaalinayo markabka iyo xamuulka saaran, iyo sidoo kale in laga hortago khatar kale oo ka dhalata goobta uu markabku ku caariyay.
Dhacdadan ayaa sidoo kale la xiriirta walaaca laga qabo in xaaladda markabku ay saameyn ku yeelato deegaanka badda. Hase yeeshee, Maamulka Dekedda Muqdisho ayaa sheegay in ilaa hadda aan la soo sheegin wax wasakhow badeed ah oo ka dhashay dhacdada, sidoo kalena aan la arag wax wasakhow ah oo ka yimid markabka.
Maamulka ayaa sheegay in xaaladda markabka iyo goobta uu ku caariyay si dhow loola socdo, iyadoo la ilaalinayo markabka, shaqaalihii laga soo badbaadiyey iyo xamuulka saaran.
Badbaadinta 18-ka shaqaale ayaa soo afjartay qeybtii ugu horreysay ee howlgalka, iyadoo hadda diiradda la saarayo sugidda markabka iyo sidii loo qiimeyn lahaa xaaladdiisa, iyadoo la tixgelinayo badbaadada dadka, deegaanka iyo maraakiibta kale ee isticmaala marin-biyoodka.
Maamulka Dekedda Muqdisho iyo hay’adaha dowladda ee ku shaqada leh ayaa sheegay inay sii wadi doonaan la socodka xaaladda MV JACUAR, ilaa laga gaarayo go’aan ku saabsan tallaabada xigta ee markabka iyo xamuulka saaran.
