Dagaal muddo ku dhow 30 daqiiqo socday ayaa maanta ka dhacay Garoonka Diyaaradaha Ogaas Khaliif ee magaalada Beledweyne, xarunta gobolka Hiiraan, kaas oo dhexmaray ciidamo ka tirsan Macawiisleyda beesha Xawaadle iyo ciidamada Jabuuti ee qaybta ka ah howlgalka taageerada amniga Soomaaliya.
Wararka hordhaca ah ayaa sheegaya in iska horimaadka uu sababay dhimasho iyo dhaawac soo kala gaaray labada dhinac, iyadoo ciidamada Jabuuti ay ugu dambeyn la wareegeen gacan-ku-haynta garoonka diyaaradaha.
Dagaalka ayaa la sheegay inuu billowday kaddib markii ay isku dhaceen ciidamada Macawiisleyda iyo kuwa Jabuuti, kuwaas oo garab siinaya ciidamada Dowladda Federaalka Soomaaliya iyo kuwa maamulka HirShabelle.
Wararka laga helayo magaalada ayaa tilmaamaya in dagaalku socday ku dhowaad nus saac, iyadoo labada dhinac ay adeegsadeen hub kala duwan. Xaaladda garoonka ayaa markii dambe la sheegay inay gacanta ugu gashay ciidamada Jabuuti.
Xogta hordhaca ah ee laga helayo iska horimaadka ayaa muujinaysa in khasaaro dhimasho iyo dhaawac leh uu soo gaaray labada dhinac.
Warbixinno laga helay goobta dagaalka ayaa sheegaya in dhinaca Macawiisleyda Xawaadle ay dagaalka kaga dhinteen lix xubnood, halka dhinaca ciidamada Jabuuti uu ka dhintay hal askari, saddex kalena ay dhaawacmeen.
Hase yeeshee, wararkii ugu horreeyay ee dagaalka ayaa sheegayay in laba askari oo Jabuutiyaan ah ay dhinteen, laba kalena ay dhaawacmeen, halka dhinaca Macawiisleyda la sheegay in afar askari ay dhaawacmeen.
Tirada khasaaraha ayaa weli ah mid aan si madax-bannaan loo xaqiijin, waxaana muuqata in xogaha kala duwan ee laga helayo goobta ay ku jiraan is-khilaaf ku saabsan tirada dhimashada iyo dhaawaca.
Iska horimaadkan ayaa kusoo beegmaya xilli magaalada Beledweyne ay ka taagan tahay xiisad siyaasadeed iyo mid amni oo la xiriirta khilaafaadka maamulka HirShabelle iyo tabashooyinka ay qabaan qaar ka mid ah siyaasiyiinta, waxgaradka iyo hoggaanka dhaqanka gobolka Hiiraan.
Macawiisleyda beesha Xawaadle ayaa ka mid ah xoogagga deegaanka ee door muuqda ku lahaa dagaalka lagula jiro Al-Shabaab, balse khilaafaadka siyaasadeed ee ka taagan gobolka ayaa muddooyinkii dambe saameyn ku yeeshay xiriirka u dhexeeya qaar ka mid ah kooxaha deegaanka iyo hay’adaha dowladda.
Dhacdadan ayaa sidoo kale muujinaysa sida ay xiisadaha siyaasadeed ee ka jira gobolka Hiiraan ugu gudbi karaan goobaha amniga muhiimka u ah, gaar ahaan xarumaha ay joogaan ciidamada dowladda iyo kuwa howlgalka Midowga Afrika.
Ciidamada Jabuuti ayaa muddo dheer qayb ka ahaa taageerada amniga Soomaaliya, gaar ahaan gobolka Hiiraan, halkaas oo ay ka taageeraan ciidamada dowladda dagaalka ka dhanka ah Al-Shabaab.



