Guddoomiyaha gobolka Banaadir ahna duqa magaalada Muqdisho, Xassan Maxamed Xuseen Muungaab, ayaa amar ku bixiyay in si buuxda loo adeegsado lacagta shilin Soomaaliga, kaddib cabashooyin isa soo tarayay oo ku saabsan diidmada lacagtaas ee suuqyada caasimadda.
Go’aankan ayaa yimid kaddib kulan degdeg ah oo uu guddoomiyuhu la yeeshay qaybaha kala duwan ee ganacsatada ku sugan Muqdisho, oo ay ku jireen sarif-layaal, tafaariiqleyda, ganacsatada khudaarta iyo hilibka, gaadiidleyda, iyo wakiillo ka socday rugaha ganacsiga heer gobol iyo heer qaran.
Kulanka ayaa diiradda lagu saaray saameynta ay leedahay diidmada shilin Soomaaliga iyo sababaha ka dambeeya, iyadoo ganacsatadu ay soo bandhigeen cabashooyin la xiriira caqabadaha dhaqaale ee arrintan ka dhashay.
Guddoomiyaha ayaa caddeeyay in aan la aqbali karin in la diido lacagta shilin Soomaaliga, isaga oo ku tilmaamay shilin Soomaaliga inuu yahay astaan muhiim u ah jiritaanka iyo dhaqdhaqaaqa dhaqaale ee dalka.
“Ma ahan suurtagal in la diido adeegsiga shilin Soomaaliga,” ayuu yiri, isaga oo intaa ku daray in ilaalinta lacagta qaranku ay tahay waajib dastuuriga ah iyo mid damiir ku dhisan.
Wuxuu sidoo kale amar ku bixiyay in dhammaan canshuuraha maxalliga ah lagu bixiyo shilin Soomaali, halka sariflayaashana lagu waajibiyay inay aqbalaan sarifka lacagtaas, isagoo uga digay tallaabo sharci ah cid kasta oo diidda.
Duqa magaalada ayaa ganacsatada ugu baaqay inay si degdeg ah u joojiyaan diidmada shilin Soomaaliga, isaga oo ballan qaaday in maamulka gobolka Banaadir uu fududeyn doono caqabadaha ay la kulmaan ganacsatada.
Dhankooda, ganacsatada ayaa soo dhaweeyay kulanka, iyagoo muujiyay sida ay uga xun yihiin dhibaatooyinka bulshada ka soo gaaray diidmada lacagta, isla markaana ballan qaaday inay xoojinayaan adeegsigeeda.
Go’aankaan kasoo baxay maamulka gobolka Baanadir, ayaa yimid, kaddib markii maalmihii ugu dambeeyay Muqdisho laga diiday isticmaalka lacagta shilinka Soomaaliga.
