Hadalada adag ee Fiqi ayaa kusoo aadaya xilli jawiga siyaasadda Soomaaliya uu galay marxalad aad u xasaasi ah, iyadoo mucaaradka iyo dowladda ay isku hayaan arrimo la xiriira jihada siyaasadda, doorashooyinka, iyo dastuurka dalka. Marka hadallo kulul oo ay ku jiraan hanjabaado, jees-jees siyaasadeed, ama ereyo kicin kara taageerayaasha dhinacyada kala duwan ay soo baxaan, waxay sare u qaadi karaan xiisadda siyaasadeed ee horey u jirtay.
Dhanka kale, hadalka ku saabsan in “bannaanbixii lagu maadeystay” iyo in mucaaradka lagu tilmaamo inay awooddooda dhulka ku muujin waayeen, wuxuu muujinayaa in dowladda ama masuuliyiinta taageersan ay isku dayayaan inay muujiyaan in mucaaradku aanu lahayn culays siyaasadeed oo saameyn leh. Laakiin mucaaradku waxay dhankooda u muuqdaan kuwo diyaargarow siyaasadeed iyo mid abaabul ku jira, taas oo muujin karta in loolanka siyaasadeed aanu weli dhammaan.
Saadaasha mustaqbalka dhow waxay tilmaami kartaa labo waddo; mid waa in xiisadda sii kororto haddii hadallada kulul iyo is-muujinta awoodda ay sii socdaan, taas oo abuuri karta kala fogaansho siyaasadeed iyo xaalad amni oo adag. Waddada labaadna waa in cadaadis siyaasadeed iyo mid bulshada ka yimaada uu ku qasbo dhinacyada inay galaan wada-hadal iyo is-afgarad, gaar ahaan iyadoo Soomaaliya ay ku jirto marxalad doorashooyin iyo go’aanno siyaasadeed oo muhiim ah.
“Madax in la jabiyo ayay eheed” waxay noqotay Erayo muujinaya in xaaladdu gaartay meel xun oo ka soo baxay wasiir aan sharciyad heeysanin, balse waxa si weyn isha loogu hayn doonaa waa sida dowladda iyo mucaaradku u maareeyaan maalmaha soo socda, maadaama tallaabo kasta oo qaldan ay xaaladda uga sii dari karto halkii xal loo heli lahaa.
