Afhayeenka QM Stéphane Dujarric ayaa sheegay in la bilaabay Qorshe Gargaar Bani’aadannimo oo Soomaaliya loogu talagalay sannadka 2026, kaas oo ku kacaya $852 milyan. Lacagtan waa 40% ka yar tii la codsaday sannadkii hore, waxaana lagu caawinayaa 2.4 milyan oo qof.
Dujarric wuxuu sheegay in hoos u dhaca lacagta uusan ahayn sababtoo ah baahiyaha dadka oo yaraaday, balse uu ka yimid lacag la’aan iyo kheyraad kooban.
Wuxuu intaa ku daray in adeegyo badan oo muhiim ah ay yaraandoonaan, maaddaama in ka yar kala bar dadka u baahan gargaar ay heli doonaan caawimaad.
Afhayeenku wuxuu ka digay in haddii aan si degdeg ah loo kordhin gargaarka, abaarta daba-dheeraatay, nolol-beelka, barakaca, cudurrada iyo gargaarka oo yaraada ay sii xumeyn doonaan cunno-yarida, biyo la’aanta iyo khataraha caafimaad.
Wuxuu xusay in sannadkii hore Qaramada Midoobay ay codsatay $1.4 bilyan, balse la helay oo keliya $397 milyan (27%), taasoo sababtay in hay’adaha gargaarku ay yareeyaan ama joojiyaan caawimaad naf-badbaadin ah.
Dhanka kale, qorshahan wuxuu yimid bil kaddib markii Israa’iil ay sheegtay inay aqoonsatay Somaliland inay tahay dal madax-bannaan. Somaliland waxay ku dhawaaqday gooni-isu-taag 1991, balse weligeed ma helin aqoonsi caalami ah.
