Dowladda Kenya ayaa si rasmi ah dib ugu furtay xuduudda ay la wadaagto Soomaaliya ee ganacsiga dhulka ee qaadka (miraa), tallaabo taariikhi ah oo soo afjaraysa 15 sano oo hakad iyo xannibaad ah.
Go’aankan oo ay ansixisay Golaha Amniga Qaranka (National Security Council) ayaa lagu tilmaamay mid wax weyn ka beddeli doona ganacsiga qaadka, gaar ahaan beeraleyda iyo ganacsatada gobolka Meru.
Xuduudaha dib loo furay waxaa kamid ah Mandera, Liboi iyo Kiunga, kuwaas oo hadda loo oggolaaday in qaadka Kenya laga qaado dhulka lana geeyo gudaha Soomaaliya.
Arrintan ayaa meesha ka saaraysa ku-tiirsanaantii dheeraa ee duulimaadyada qaaliga ah ee laga dhoofin jiray Garoonka JKIA, kuwaas oo ganacsatada ku qasbay kharash badan iyo la tacaalid kartello si weyn u maamuli jiray dhoofinta.
Ururka Nyambene Miraa Farmers and Traders Association (Nyamita) ayaa si weyn u soo dhaweeyay go’aankan, iyagoo sheegay inuu yahay mid “geesinimo leh, isla markaana dib u soo noolaynaya ganacsigii qaadka ee Kenya iyo Soomaaliya.”
Guddoomiyaha ururkaas, Kimathi Munjuri, ayaa sheegay in markii xuduuddu furnayd horey loo dhoofin jiray in ka badan 20 tan oo qaad ah maalin kasta, taas oo qiimaheedu gaarayay ilaa Sh5 milyan.
Dhanka kale, Agaasimaha Guud ee Hay’adda Beeraha iyo Cuntada (AFA), Bruno Linyiru, ayaa sheegay in dowladda ay diyaarinayso hannaan amni oo lagu xaqiijinayo badqabka ganacsatada iyo xamuulkooda inta ay socdaan, Wuxuu intaas ku daray in faahfaahin dheeraad ah laga soo saari doono dhawaan.
