Hay’adda UK Maritime Trade Operations (UKMTO) ayaa sheegtay in markab marayay dhinaca bari ee Gacanka Cadmeed la afduubtay, kadibna loo leexiyay dhanka biyaha Soomaaliya.
Hay’addu waxay sheegtay in dhacdadan lagu soo wargeliyay Jimcihii, iyadoo markabku xilligaas marayay meel qiyaastii 65 mayl-badeed (120 kiiloomitir) koonfur kaga beegan magaalada Al Mukalla ee gobolka Hadramout ee dalka Yemen.
Sida UKMTO ay sheegtay, kooxo aan la aqoonsan ayaa fuulay markabka intii uu ku sii jeeday dhinaca bari. Warbixin dambe oo ay soo saartay hay’addu ayaa lagu sheegay in markabka loo kaxeeyay biyaha Soomaaliya, taasoo sababtay in dhacdada si rasmi ah loogu tilmaamo afduub (Hijack).
UKMTO waxay sheegtay in hay’adaha ay khuseyso ay baarayaan dhacdada.
Dhanka kale, Ilaalada Xeebaha Yemen ayaa Jimcihii sheegay inay la socdaan afduubka markabka shidaalka qaada ee Asana, kaas oo lagu qabtay meel ka badan 26 mayl-badeed u jirta xeebaha gobolka Hadramout.
Ilaalada Xeebaha Yemen waxay ku eedeeyeen kooxo burcad-badeed Soomaali ah inay fuliyeen afduubka, hase yeeshee ma aysan shaacin cidda iska leh markabka, mana jirto koox ilaa hadda sheegatay mas’uuliyadda weerarka.
Bishii May 11-keedii, Wasaaradda Arrimaha Dibadda Masar ayaa xaqiijisay in markab shidaal oo ay saarnaayeen siddeed badmaax oo Masaari ah lagu afduubtay meel u dhow xeebaha Soomaaliya. Dhacdadaas ayaa timid maalmo kadib markii sidoo kale la soo sheegay afduubka markab kale oo ay saarnaayeen 12 badmaax oo u kala dhashay Masar iyo Hindiya.
Burcad-badeednimada xeebaha Soomaaliya ayaa si weyn u baahday intii u dhaxaysay 2008 illaa 2018, balse way yaraatay sanadihii xigay. Si kastaba ha ahaatee, weerarrada ayaa mar kale kordhay dabayaaqadii 2023, iyadoo ay barbar socdeen xiisadaha amni ee gobolka.
Dhanka kale, kooxda Xuuthiyiinta Yemen ayaa bishii Abriil ku hanjabtay inay sii xoojin doonto weerarradeeda militari haddii ay dib u billowdaan weerarrada Mareykanka iyo Israa’iil ee ka dhanka ah Iran.
